दिवाळीचा सण अवघ्या काही दिवसांवर आलेला असतानाच व्यावसायिक गॅस सिलिंडरच्या दरात पुन्हा एकदा वाढ करण्यात आली आहे. नोव्हेंबर महिन्याच्या पहिल्याच दिवशी तेल कंपन्यांनी व्यावसायिक एलपीजी सिलिंडरच्या किमती वाढवून हॉटेल व्यावसायिकांसह खाद्यपदार्थ उत्पादकांना महागाईचा आणखी एक धक्का दिला आहे. विशेष म्हणजे, ही सलग तिसऱ्या महिन्यातील दरवाढ आहे. देशातील दिल्ली, मुंबई, कोलकाता आणि चेन्नई या चारही महानगरांमध्ये १९ किलोच्या व्यावसायिक सिलिंडरच्या किमतीत १० ते १७ रुपयांची वाढ झाली आहे. दिवाळीच्या काळात मिठाई, फराळ आणि खाद्यपदार्थांना मोठी मागणी असताना झालेल्या या दरवाढीचा परिणाम बाजारपेठेवर होण्याची शक्यता आहे.
इंडियन ऑइल कॉर्पोरेशनच्या आकडेवारीनुसार, दिल्लीत व्यावसायिक गॅस सिलिंडरच्या किमतीत १० रुपयांची वाढ झाली असून नवीन दर २,८२० रुपये झाला आहे. कोलकात्यात सर्वाधिक १७ रुपयांची वाढ झाली असून तेथील दर २,९७१ रुपयांवर पोहोचला आहे. मुंबईत १०.५० रुपयांची वाढ झाल्याने सिलिंडरसाठी आता २,७७५ रुपये मोजावे लागणार आहेत. तर चेन्नईमध्ये ११.५० रुपयांच्या वाढीनंतर नवीन दर २,९९४.५० रुपये झाला आहे. त्यामुळे व्यावसायिक गॅस वापरणाऱ्या छोट्या-मोठ्या व्यावसायिकांच्या खर्चात आणखी भर पडणार आहे.
हे ही वाचा:
कॉक्रोच जनता पार्टीचा इंडी आघाडीच्या रॅलीत सहभाग नाही
हवाय इंटरनेट दळणवळणावर लक्ष ठेवणारा मॉनिटर
राहुल गांधींची ज्ञानेश कुमारांविरोधात महाभियोगाची मागणी
विशेष म्हणजे, ऑगस्ट महिन्यानंतर सलग तीन वेळा व्यावसायिक गॅस सिलिंडरच्या किमती वाढवण्यात आल्या आहेत. या तीन दरवाढींचा एकत्रित परिणाम पाहता दिल्लीत सिलिंडरच्या किमतीत ८२ रुपये, कोलकात्यात ९८.५० रुपये, मुंबईत ८३.५० रुपये आणि चेन्नईत ८८.५० रुपयांची वाढ झाली आहे. या दरवाढीमुळे हॉटेल, रेस्टॉरंट, खानावळी, मिठाईची दुकाने आणि केटरिंग व्यावसायिकांचे आर्थिक गणित बिघडण्याची शक्यता आहे. विशेषतः दिवाळीच्या काळात मोठ्या प्रमाणात फराळ आणि मिठाई तयार करणाऱ्या व्यावसायिकांना वाढीव इंधन खर्चाचा सामना करावा लागणार आहे. हा अतिरिक्त खर्च ग्राहकांकडे वळवला गेल्यास खाद्यपदार्थांच्या किमतीही वाढू शकतात.
दरम्यान, व्यावसायिक गॅसच्या दरात वाढ झाली असली तरी घरगुती एलपीजी सिलिंडरच्या किमतीत कोणताही बदल करण्यात आलेला नाही. मुंबईत १४.२ किलोच्या घरगुती सिलिंडरचा दर ९४१.५० रुपये कायम आहे. दिल्लीत हा दर ९४२ रुपये, कोलकात्यात ९६८ रुपये, तर चेन्नईमध्ये ९५७.५० रुपये आहे. जून महिन्यानंतर घरगुती गॅसच्या किमतीत बदल झालेला नाही. त्यामुळे सर्वसामान्य कुटुंबांना तूर्तास दिलासा मिळाला असला, तरी व्यावसायिक गॅसच्या दरवाढीमुळे हॉटेलमधील जेवणापासून ते दिवाळीच्या मिठाईपर्यंत अनेक वस्तूंच्या किमतींवर अप्रत्यक्ष परिणाम होण्याची शक्यता आहे.
