उत्तर प्रदेश पोलिसांनी बरेलीमध्ये एका धर्मांतर टोळीचा पर्दाफाश केला आहे. ही टोळी तरुण पुरुष, महिला आणि अगदी संपूर्ण कुटुंबांना आर्थिक प्रलोभन आणि ब्रेनवॉशिंगद्वारे इस्लाम स्वीकारण्यास भाग पाडत होती. हे नेटवर्क इतर राज्यांमध्येही सक्रिय होते आणि यापूर्वी समोर आलेल्या छंगूर बाबा प्रकरणाशी त्याची समांतरता आहे. या प्रकरणी पोलिसांनी अब्दुल मजीद, सलमान, आरिफ आणि फहीम अशा चार जणांना अटक केली आहे. ते मदरसा चालवत होते आणि गरीब कुटुंबांना टार्गेट करत होते. तपासकर्त्यांनी सांगितले की, मदरशातील मौलवी मजीद हा धर्मांतर टोळीचा सूत्रधार असल्याचे मानले जाते.
अलीगड येथील रहिवासी अखिलेश कुमारी यांनी १५ ऑगस्ट रोजी त्यांचा अंध मुलगा प्रभात उपाध्याय बेपत्ता झाल्याची तक्रार केली तेव्हा हे रॅकेट उघडकीस आले. प्रभात, ज्याने हैदराबाद विद्यापीठातून पीएचडी केली आहे आणि बरेली आणि बुलंदशहर येथील सरकारी महाविद्यालयांमध्ये शिकवत होता, तो शेवटचा टोळीतील सदस्यांच्या संपर्कात दिसला होता.
पोलिसांनी दिलेल्या माहितीनुसार, प्रभातला लग्नाच्या बहाण्याने बरेलीतील एका मदरशात नेण्यात आले होते आणि त्याचे धर्मांतर करून त्याचे नाव हमीद ठेवण्यात येणार होते. त्याच्या आईने आरोप केला की ते पुरुष (आरोपी) त्याच्यावर अनेक महिन्यांपासून दबाव आणत होते. जेव्हा ती आणि तिचे नातेवाईक मदरशात आले तेव्हा त्यांना धमकावून हाकलून देण्यात आल्याचे पीडित मुलाच्या आईने सांगितले.
मदरशावर पोलिसांनी टाकलेल्या छाप्यामुळे धार्मिक विधी दरम्यान धर्मांतर थांबवण्यात आले. अधिकाऱ्यांनी धार्मिक साहित्य, धर्मांतराचे प्रमाणपत्रे आणि वादग्रस्त धर्मोपदेशक झाकीर नाईक याच्या भाषणांसह सीडी जप्त केल्या, ज्यांचा वापर या लोकांना शिकवण्यासाठी केला जात असे असे अधिकाऱ्यांचे म्हणणे आहे.
ब्रिजपाल प्रकरण: एका कुटुंबाचे जबरदस्तीने धर्मांतर
या टोळीवर दशकाहून अधिक काळापूर्वी बरेलीतील सुभाष नगर येथील रहिवासी ब्रिजपाल साहू यांना टार्गेट केल्याचा आरोप आहे. पोलिस रेकॉर्ड आणि त्याच्या नातेवाईकांच्या साक्षीवरून असे दिसून येते की, त्यावेळी १५ वर्षांचा ब्रिजपाल याला एका कोचिंग सेंटरमधील मुस्लिम तरुणांनी ब्रेनवॉश केले होते आणि अब्दुल्ला या नावाने त्याचे इस्लाम धर्मात रूपांतर केले होते. सुरुवातीला त्याने प्रतिकार केला तेव्हा टोळीतील सदस्यांनी त्याच्या कुटुंबाविरुद्ध विनयभंगाचा गुन्हा दाखल करून बदला घेतला. त्यानंतर ब्रिजपालला पुण्याला नेण्यात आले आणि जेव्हा तो परत आला तेव्हा तो अब्दुल्ला म्हणून ओळखला जाऊ लागला.
त्याच्या नातेवाईकांनी इंडिया टुडेला सांगितले की, ब्रिजपालचे वडील, जे रोजंदारीवर काम करतात, त्यांनी त्यांच्या मुलाला समजावून सांगण्याचा प्रयत्न केला, पण काही उपयोग झाला नाही. वडिलांची प्रकृती बिघडली आणि त्यानंतर लवकरच त्यांचा मृत्यू झाला. कालांतराने, बृजपालच्या आईचेही दबावाखाली धर्मांतर करण्यात आले, तिचे नाव अमिना ठेवण्यात आले. बृजपाल, जो आता अब्दुल्ला आहे, त्याने आपल्या बहिणीचे लग्न मोडले आणि तिलाही आयेशा नावाने धर्मांतर करायला लावले.
या घटनाक्रमामुळे परिसरात तणाव निर्माण झाला आणि नातेवाईकांनी बृजपाल आणि त्याच्या कुटुंबाशी असलेले संबंध तोडले, असा दावा त्याच्या नातेवाईकांनी केला. नंतर बृजपालने त्याचे वडिलोपार्जित घर विकले आणि तो मुस्लिमबहुल वसाहतीत राहायला गेला. नातेवाईकांनी पोलिसांना सांगितले की, या टोळीने कुटुंबाला इस्लाम स्वीकारल्यास जमीन, आर्थिक मदत आणि शेतीसाठी मदत देण्याचे आमिष दाखवले होते.
हे ही वाचा :
राहुल गांधींच्या ‘वोटर अधिकार यात्रा’दरम्यान चोरट्यांचा हैदोस; आरजेडी नेत्याचे फोन-पाकीट चोरी!
जम्मू-काश्मीरमध्ये घुसखोरी उधळली; दोन दहशतवादी ठार!
गणेशोत्सवानिमित्त सांस्कृतिक कार्य विभागाच्या वतीने रील स्पर्धेचे आयोजन
कोणीतरी तुमच्यावर खूश नाही! कोण म्हणाले मोदींना!
एसपी (दक्षिण) अंशिका वर्मा म्हणाल्या की, या टोळीचे नेटवर्क बरेलीच्या पलीकडे इतर जिल्ह्यांमध्ये आणि राज्यांमध्ये पसरले आहे. “या गटाने विशेषतः आर्थिकदृष्ट्या कमकुवत कुटुंबांना लक्ष केले होते, ज्यांना सहजपणे आमिष दाखवता येत होते. आतापर्यंत किती लोक आणि कुटुंबे अडकली आहेत याचा आम्ही तपास करत आहोत.”
आरोपी अब्दुल मजीदच्या ताब्यातून जप्त केलेल्या कागदपत्रांवरून शेकडो आर्थिक व्यवहार दिसून येतात, ज्यामध्ये देणग्या अनेक बँक खात्यांमधून पाठवल्या जात होत्या, असे अधिकाऱ्यांनी सांगितले. पोलिसांना संशय आहे की या निधीचा वापर मदरसे चालवण्यासाठी आणि धर्मांतरासाठी केला जात होता. धर्मांतर टोळीतील इतर सदस्यांचा शोध घेण्याचे प्रयत्न सुरू आहेत.
