एशियन गेम्स २०२६ मध्ये भारतासाठी कांस्यपदक जिंकणाऱ्या बॉक्सर कपिल पोखरियाने आता वर्ल्ड चॅम्पियनशिप आणि ऑलिम्पिकमध्ये देशासाठी पदक जिंकण्याचे लक्ष्य ठेवले आहे. कपिलने ९० किलो वजनी गटात दमदार कामगिरी करत कांस्यपदकावर नाव कोरले.
कपिलने ‘आयएएनएस’शी बोलताना सांगितले की, हे पदक त्याच्यासाठी वैयक्तिकदृष्ट्याही मोठे यश आहे. कॉमनवेल्थ गेम्समध्ये पदक थोडक्यात हुकल्यानंतर एशियन गेम्समध्ये कोणत्याही परिस्थितीत देशासाठी पदक जिंकायचे, हा निर्धार त्याने केला होता.
“कॉमनवेल्थमध्ये पदक हुकले होते. त्यामुळे एशियन गेम्समध्ये देशासाठी पदक मिळवायचेच, असा माझा निर्धार होता. कांस्यपदक जिंकल्याचा मला खूप आनंद आहे,” असे कपिलने सांगितले.
मात्र, कपिलला अंतिम फेरी गाठता आली नाही. उपांत्य फेरीत त्याला उझबेकिस्तानच्या तुरबेक खबीबुल्लाव याच्याकडून पराभव पत्करावा लागला. या सामन्याबाबत बोलताना कपिलने प्रतिस्पर्धी बॉक्सरने आपल्यापेक्षा चांगली कामगिरी केल्याचे मान्य केले.
“सामन्यानंतर मी प्रशिक्षकाशी चर्चा केली. माझ्याकडून कुठे चुका झाल्या आणि कोणत्या गोष्टींमध्ये सुधारणा करण्याची गरज आहे, यावर आम्ही चर्चा केली. आता प्रशिक्षण शिबिरात या कमतरतांवर काम करणार आहे,” असे त्याने सांगितले.
वर्ल्ड चॅम्पियनशिपवर नजर
एशियन गेम्सनंतरच्या लक्ष्याबाबत कपिल म्हणाला, “पुढील वर्षी वर्ल्ड चॅम्पियनशिप आहे. तेथे देशासाठी पदक जिंकण्याचा माझा प्रयत्न असेल.”
एशियन गेम्सदरम्यान आपल्यावर मोठा दबाव होता, असेही कपिलने सांगितले. कॉमनवेल्थ गेम्समध्ये पदक हुकल्यामुळे एशियन गेम्समध्येही तशीच परिस्थिती निर्माण होऊ नये, याची त्याला चिंता होती. एशियन गेम्स चार वर्षांनी होत असल्याने पदक न मिळाल्यास पुन्हा सुरुवातीपासून मेहनत घ्यावी लागेल, हा विचार सतत मनात होता, असे त्याने सांगितले.
मात्र, पदक निश्चित झाल्यानंतर त्याचा आत्मविश्वास वाढला आणि आनंदही झाला.
‘ऑलिम्पिकमध्ये पदक जिंकायचे’
कपिलच्या मते, पुढील दोन वर्षे त्याच्या कारकिर्दीसाठी अत्यंत महत्त्वाची आहेत. पुढील वर्षी वर्ल्ड चॅम्पियनशिपनंतर ऑलिम्पिक पात्रतेची प्रक्रिया सुरू होणार आहे.
“प्रत्येक खेळाडूचे ऑलिम्पिकमध्ये खेळण्याचे स्वप्न असते. माझेही तेच स्वप्न आहे. प्रथम ऑलिम्पिकसाठी पात्र ठरायचे आणि त्यानंतर देशासाठी पदक जिंकायचे आहे,” असा निर्धार कपिलने व्यक्त केला.
