एशियन गेम्स २०२६ मध्ये भारताच्या बॉक्सिंग संघाने दिमाखदार कामगिरी करत मोहिमेचा शानदार समारोप केला. पुरुषांच्या ८० किलो वजनी गटाच्या अंतिम फेरीत अंकुश पंघालने दक्षिण कोरियाच्या मिनसोंग किमचा ४-० असा पराभव करत भारताला आणखी एक सुवर्णपदक मिळवून दिले. या विजयासह भारताच्या बॉक्सिंग संघाने या स्पर्धेत ३ सुवर्ण आणि ३ कांस्य अशा एकूण ६ पदकांची कमाई केली.
अंकुशने सुरुवातीपासूनच सामन्यावर वर्चस्व राखले. पहिल्या फेरीत आक्रमक पंचिंगसह त्याने आघाडी घेतली. दुसऱ्या फेरीत संयमी बचावासोबत अचूक काउंटर पंचिंग करत त्याने प्रतिस्पर्ध्यावर दबाव कायम ठेवला. तिसऱ्या फेरीतही त्याने बचाव आणि आक्रमणाचा सुरेख मेळ साधत सामना आपल्या बाजूने झुकवला. अखेर पंचांच्या गुणांकनात ४-० असा एकतर्फी विजय मिळवत अंकुशने सुवर्णपदकावर शिक्कामोर्तब केले.
परवीन, लवलीनानेही जिंकले सुवर्ण
याआधी परवीन हुड्डा आणि लवलीना बोरगोहेन यांनीही भारताला सुवर्णपदक मिळवून दिले. परवीनने महिलांच्या गटात चीन तैपेईच्या निएन-चिन चे हिच्यावर ३-२ असा स्प्लिट निर्णयाने विजय मिळवला. या कामगिरीसह एशियन गेम्समध्ये सुवर्णपदक जिंकणारी ती भारताची तिसरी महिला बॉक्सर ठरली.
लवलीना बोरगोहेनने महिलांच्या ७५ किलो गटात चीनच्या जियी बाओचा ५-० असा पराभव करत सुवर्णपदक पटकावले. एशियन गेम्स २०२२ मधील रौप्यपदकानंतर लवलीनाने यावेळी सुवर्णपदकावर नाव कोरले. तिच्या वाढदिवशी मिळालेले हे सुवर्णपदक तिच्यासाठी विशेष ठरले.
तीन कांस्यपदकांचीही कमाई
भारताच्या खात्यात बॉक्सिंगमधून आणखी ३ कांस्यपदके जमा झाली. कपिल पोखरिया (९० किलो), नरेंद्र बेरवाल (९० किलोपेक्षा अधिक) आणि प्रिया घांघस (६० किलो) यांनी उपांत्य फेरीपर्यंत मजल मारली. मात्र, उपांत्य फेरीतील पराभवानंतर त्यांना कांस्यपदकावर समाधान मानावे लागले.
भारताने एशियन गेम्स २०२६ मध्ये एकूण ११ बॉक्सर मैदानात उतरवले होते. काही खेळाडूंना उपांत्यपूर्व आणि उपांत्यपूर्व फेरीतच स्पर्धेतून बाहेर पडावे लागले.
गोल्डच्या संख्येत ऐतिहासिक कामगिरी
३ सुवर्णपदकांसह ६ पदकांची कमाई करत भारताने एशियन गेम्समधील आपल्या बॉक्सिंग कामगिरीत महत्त्वाची भर घातली. मागील एशियन गेम्समध्ये भारताने बॉक्सिंगमध्ये १ रौप्य आणि ३ कांस्य अशी ४ पदके जिंकली होती. यंदाच्या स्पर्धेत सुवर्णपदकांची संख्या वाढल्याने भारतीय बॉक्सिंग संघाची कामगिरी विशेष ठरली. एशियन गेम्स २०१० मध्ये भारताने बॉक्सिंगमध्ये सर्वाधिक ९ पदके जिंकली होती. मात्र, यंदाच्या मोहिमेचे वैशिष्ट्य म्हणजे ३ सुवर्णपदके.
