भारतीय पुरुष बॅडमिंटन संघाने आशियाई क्रीडा स्पर्धेच्या उपांत्यपूर्व फेरीत यजमान जपानचा ३-० असा पराभव करत पदक निश्चित केले. लक्ष्य सेनच्या शानदार पुनरागमनासह सात्त्विकसाईराज रंकीरेड्डी आणि चिराग शेट्टी यांच्या दुहेरीतील विजयामुळे भारताने दमदार कामगिरी करत उपांत्य फेरीत प्रवेश केला. मागील आशियाई क्रीडा स्पर्धेत रौप्यपदक जिंकणाऱ्या भारतीय संघाने यंदाही पदकाची शाश्वती मिळवली आहे.
स्पर्धेपूर्वी काही सामन्यांमध्ये लवकर पराभव पत्करावा लागल्याने आत्मविश्वासासाठी झगडणाऱ्या लक्ष्य सेनने निर्णायक सामन्यात जबरदस्त पुनरागमन केले. जागतिक क्रमवारीत सातव्या स्थानावर असलेल्या आणि दोन वेळा जागतिक अजिंक्यपद स्पर्धेतील रौप्यपदक विजेत्या कोडाई नाराओकाविरुद्ध लक्ष्य एका क्षणी निर्णायक गेममध्ये १४-१९ असा पिछाडीवर होता.
मात्र, अल्मोरा येथील २५ वर्षीय लक्ष्यने सलग सात गुण मिळवत सामन्याचा निकालच बदलून टाकला. त्याने नाराओकाचा ११-२१, २१-५, २१-१९ असा पराभव करत भारताला १-० अशी आघाडी मिळवून दिली.
पहिल्या दुहेरी सामन्यात सात्त्विकसाईराज रंकीरेड्डी आणि चिराग शेट्टी या भारतीय जोडीने माजी जागतिक विजेते ताकुरो होकी आणि युगो कोबायाशी यांचा कडवा प्रतिकार मोडून काढला. दोन गेममध्ये रंगलेल्या सामन्यात भारतीय जोडीने २१-१८, २४-२२ असा विजय मिळवत भारताची आघाडी २-० अशी भक्कम केली.
या मोसमात दोन विजेतेपद पटकावलेल्या सात्त्विक-चिराग जोडीने निर्णायक क्षणी संयमी खेळ करत संघाला विजयाच्या उंबरठ्यावर नेले.
यानंतर एकेरीच्या सामन्यात आशियाई बॅडमिंटन अजिंक्यपद स्पर्धेचा यंदाचा अंतिम फेरीतील खेळाडू आयुष शेट्टीने जागतिक क्रमवारीत १६व्या स्थानावर असलेल्या कोकी वातानाबेचा सामना केला.
आयुषने प्रभावी खेळ सादवत वातानाबेचा २१-१०, २१-१९ असा पराभव केला. या विजयासह भारताने जपानवर ३-० अशी विजयी आघाडी घेत सामना जिंकला आणि आशियाई क्रीडा स्पर्धेतील पदक निश्चित केले.
