युवा सलामीवीर यशस्वी जायसवाल याच्यात अफाट गुणवत्ता आहे. मात्र, त्याला सातत्याने संधी नाकारून निवडकर्ते त्याचा आत्मविश्वासच खच्ची करत आहेत, अशा शब्दांत भारताचा माजी फिरकीपटू आर. अश्विन याने भारतीय संघ व्यवस्थापन आणि निवडकर्त्यांच्या कार्यपद्धतीवर प्रश्नचिन्ह उपस्थित केले आहे. न्यूझीलंडविरुद्धच्या पाच एकदिवसीय सामन्यांच्या मालिकेसाठी जाहीर झालेल्या भारतीय संघात जायसवालला स्थान न मिळाल्याने अश्विनने नाराजी व्यक्त केली.
२०२७ च्या विश्वचषकासाठी पर्यायी सलामीवीर म्हणून विचार केला जात असलेल्या जायसवालला संधी नाकारण्याचा निर्णय चुकीचा असल्याचे अश्विनने म्हटले आहे. विशेषतः शुभमन गिल मालिकेतील अखेरचे दोन सामने खेळणार नसतील, तर त्या जागी जायसवालला संधी मिळायला हवी होती, असे मत त्याने व्यक्त केले.
आपल्या यूट्यूब चॅनेलवर बोलताना अश्विन म्हणाला, “शुभमन गिल अखेरचे दोन एकदिवसीय सामने खेळणार नसतील, तर यशस्वी जायसवालला त्या जागी निश्चितच संधी मिळायला हवी. त्याचा आत्मविश्वास कमी होईल, अशी परिस्थिती निर्माण होणे दुर्दैवी आहे. तो ज्या पद्धतीने धावा करत होता, ते पाहता तो धावांचा अक्षरशः यंत्र बनला होता. अशा खेळाडूचा आत्मविश्वास ढासळत असेल, तर त्याला शक्य तिथे संधी देणे ही संघ व्यवस्थापन आणि निवडकर्त्यांची जबाबदारी आहे. मात्र, त्याला पुरेशा संधीच मिळत नाहीत. हा निर्णय त्याच्या हिताचा नाही.”
जायसवालसारख्या गुणवत्तावान खेळाडूला नियमित संधी न मिळाल्यास त्याच्या कारकिर्दीतील महत्त्वाच्या टप्प्यावर त्याच्या आत्मविश्वासावर परिणाम होऊ शकतो, अशी भीतीही अश्विनने व्यक्त केली. कसोटी क्रिकेटसाठी तयारी करणे जायसवालला आवश्यक आहे, हे मान्य करतानाच त्याला तिन्ही प्रकारच्या क्रिकेटमध्ये अखेर कधी संधी मिळाली, असा सवालही त्याने उपस्थित केला.
“यशस्वी जायसवाल हा अनमोल प्रतिभेचा खेळाडू आहे. त्याची लय पुन्हा मिळवून देण्यासाठी त्याला पुरेशा संधी देणे ही निवडकर्ते आणि संघ व्यवस्थापनाची जबाबदारी आहे. या युवा खेळाडूला स्वतःची क्षमता सिद्ध करण्यासाठी संधी मिळायलाच हवी,” असे अश्विनने स्पष्ट केले.
सहा एकदिवसीय सामन्यांत दोन शतके!
२४ वर्षीय यशस्वी जायसवालने आतापर्यंत भारताकडून सहा एकदिवसीय सामने खेळले असून, सहा डावांत दोन शतकांसह २८५ धावा केल्या आहेत. नाबाद ११६ धावा ही त्याची सर्वोच्च वैयक्तिक खेळी आहे. त्याने अखेरचा एकदिवसीय सामना २० जून २०२६ रोजी अफगाणिस्तानविरुद्ध खेळला होता. या सामन्यात त्याने ८६ चेंडूंत नाबाद ११० धावांची दमदार खेळी केली होती.
एकीकडे धावा करण्याची क्षमता आणि दुसरीकडे संघातील संधींची प्रतीक्षा, अशा कात्रीत जायसवाल सापडला आहे. आता निवडकर्ते या युवा फलंदाजाला आगामी मालिकांमध्ये संधी देणार का, याकडे क्रिकेट चाहत्यांचे लक्ष लागले आहे.
