भारताचा नेमबाज उदयवीर सिद्धू याने आंतरराष्ट्रीय नेमबाजी क्रीडा महासंघाच्या (आयएसएसएफ) विश्वचषक स्पर्धेत पुरुषांच्या १० मीटर एअर पिस्तूल प्रकारात सुवर्णपदक जिंकले. रविवारी झालेल्या अंतिम फेरीत उदयवीरने २४०.६ गुणांची कमाई करत जर्मनीचा अनुभवी ऑलिम्पिक पदकविजेता ख्रिश्चन रिट्झ याचा अवघ्या ०.५ गुणांनी पराभव केला. रिट्झला २४०.१ गुणांसह रौप्यपदक, तर इटलीच्या पाओलो मोन्ना याला २१९.८ गुणांसह कांस्यपदक मिळाले.
अंतिम फेरीतील शेवटच्या क्षणांपर्यंत सुवर्णपदकासाठी चुरस कायम होती. अखेरच्या दोन नेमांपूर्वी उदयवीर रिट्झपेक्षा ०.३ गुणांनी पिछाडीवर होता. मात्र, दबावाखालीही त्याने संयम राखत अनुक्रमे १०.२ आणि ९.८ गुण मिळवले. दुसरीकडे, रिट्झला दोन्ही नेमांमध्ये प्रत्येकी ९.६ गुण मिळाले. त्यामुळे उदयवीरने बाजी मारत भारताच्या खात्यात सुवर्णपदक जमा केले.
पात्रता फेरीत चौथे स्थान
अंतिम फेरीपूर्वी उदयवीरने पात्रता फेरीत सहा मालिकांमध्ये अनुक्रमे ९९, ९८, ९८, ९७, ९७ आणि ९६ गुण मिळवत एकूण ५८५ गुणांची नोंद केली. या कामगिरीच्या जोरावर त्याने आठ नेमबाजांच्या अंतिम फेरीत स्थान मिळवले.
भारताच्या जोनाथन गॅविन अँटनी याने पात्रता फेरीत ५८६ गुण मिळवत प्रभावी कामगिरी केली. मात्र, तो केवळ रँकिंग पॉइंट्स (आरपीओ) श्रेणीत सहभागी झाल्यामुळे पदकाच्या शर्यतीत नव्हता. त्याने इटलीच्या पाओलो मोन्नासह संयुक्तपणे सर्वोच्च गुणांची नोंद केली.
भारताच्या अजेंद्र सिंह चौहान याने ५८० गुणांसह १४वे स्थान मिळवले, तर ऑलिम्पिक पदकविजेता सरबजोत सिंह याला ५७४ गुणांसह ३१व्या स्थानावर समाधान मानावे लागले. आरपीओ श्रेणीत सहभागी झालेल्या कुमार योगेशने ५७३ गुण मिळवले.
ऑलिम्पिक पदकविजेत्यांशी स्पर्धा
अंतिम फेरीत तुर्कियेचा पॅरिस २०२४ ऑलिम्पिक पदकविजेता युसूफ डिकेचही सहभागी झाला होता. त्याला १३८.० गुणांसह सातवे स्थान मिळाले. ग्रीसच्या जॉर्जियोस गॅम्पिएराकिसने १९८.७ गुणांसह चौथे, तर लातव्हियाच्या एमिल्स वासरमानिसने १७७.६ गुणांसह पाचवे स्थान पटकावले.
काहिरा येथे विश्वचषक स्पर्धा
आयएसएसएफ रायफल आणि पिस्तूल विश्वचषक स्पर्धा ८ ते १६ ऑक्टोबर २०२६ या कालावधीत काहिरा येथे आयोजित करण्यात आली आहे. या स्पर्धेसाठी भारताने २४ सदस्यांचा संघ पाठवला आहे. स्पर्धेपूर्वी भारतीय नेमबाजांनी देहरादून येथील महाराणा प्रताप क्रीडा महाविद्यालयात १ ते ७ ऑक्टोबरदरम्यान सराव शिबिर पूर्ण केले. या शिबिरात सामन्यांच्या सरावासह नेमबाजीतील तांत्रिक बाबींवर भर देण्यात आला.
भारत या स्पर्धेत आठ वैयक्तिक ऑलिम्पिक प्रकारांसह दोन मिश्र सांघिक प्रकारांत सहभागी होत आहे. उदयवीर सिद्धूच्या सुवर्णपदकामुळे भारतीय नेमबाजी संघाच्या कामगिरीत महत्त्वाची भर पडली आहे.
