इंटर मिलानने लाजियोचा २-० असा पराभव करत दहाव्यांदा कोप्पा इटालिया फुटबॉल स्पर्धेचे विजेतेपद पटकावले. या शानदार विजयानंतर इंटर मिलानने यंदाच्या हंगामात ऐतिहासिक “डोमेस्टिक डबल” पूर्ण केलं आहे.
याआधीच इंटर मिलानने सीरी ए लीगचं २१वं विजेतेपद आपल्या नावावर केलं होतं. आता कोप्पा इटालिया जिंकत संघाने चाहत्यांना आणखी एक मोठा आनंद दिला आहे.
सामन्याच्या सुरुवातीपासूनच इंटर मिलानने आक्रमक खेळ दाखवला. संघासाठी पहिला गोल मार्कस थुरमने केला. फेडेरिको डिमार्कोच्या कॉर्नरवर थुरमने मारलेला दमदार हेडर लाजियोचा खेळाडू अॅडम मारुसिकला लागून थेट गोलपोस्टमध्ये गेला आणि इंटरला आघाडी मिळाली.
यानंतर ३५व्या मिनिटाला इंटर मिलानने आघाडी दुप्पट केली. डेनझेल डमफ्रीजने पेनल्टी बॉक्समधून दिलेल्या अप्रतिम पासवर लुटारो मार्टिनेजने सहज गोल करत संघाला २-० अशी मजबूत आघाडी मिळवून दिली.
फायनलमध्ये मिळालेल्या या दमदार विजयानंतर इंटर मिलानचे व्यवस्थापक क्रिस्टियन चिवु यांनी आनंद व्यक्त केला. ते म्हणाले,
“या हंगामात इंटरने दोन ट्रॉफी जिंकल्या आणि आम्ही त्यासाठी पात्र होतो. आमचा संपूर्ण हंगाम शानदार राहिला. क्लब आणि चाहत्यांनी नेहमीच आमच्या पाठीशी उभं राहत मोठा पाठिंबा दिला.”
ते पुढे म्हणाले,
“लीग आणि कोप्पा इटालिया जिंकणं सोपं नसतं. एका हंगामात दोन ट्रॉफी उचलणं ही मोठी गोष्ट आहे आणि आम्हाला त्याचा अभिमान आहे.”
संघाचा स्टार खेळाडू लुटारो मार्टिनेजनेही आनंद व्यक्त करत सांगितलं,
“गेल्या वर्षानंतर पुनरागमन करणं सोपं नव्हतं. पण आम्ही खेळ, वेग, कामगिरी आणि निकाल या सर्व बाबतीत उत्कृष्ट हंगाम घडवला. दोन ट्रॉफीसह वर्ष संपवणं आमच्यासाठी खूप खास आहे.”
इंटर मिलानच्या या विजयानंतर चाहत्यांमध्ये उत्साहाचं वातावरण असून संघाने पुन्हा एकदा इटालियन फुटबॉलमध्ये आपलं वर्चस्व सिद्ध केलं आहे.
