पंजाब किंग्जने लखनौ सुपर जायंट्सचा आठ विकेट्सने पराभव करून या सीझनचा दुसरा विजय नोंदवला. मंगळवारी लखनौच्या एकाना स्टेडियमवर खेळल्या गेलेल्या या सामन्यात, नाणेफेक गमावून प्रथम फलंदाजी केल्यानंतर, यजमान संघाने २० षटकांत सात गडी गमावून १७१ धावा केल्या. प्रत्युत्तरात, पंजाबने १६.२ षटकांत दोन गडी गमावून १७७ धावा केल्या आणि सामना जिंकला. सलग दोन विजयांसह, पंजाब चार गुणांसह पॉइंट टेबलमध्ये दुसऱ्या स्थानावर पोहोचला.
लखनौने दिलेल्या १७२ धावांच्या लक्ष्याचा पाठलाग करताना पंजाबची सुरुवात झटपट झाली. तथापि, तिसऱ्या षटकात, २६ धावांवर प्रियांश आर्यच्या रूपात संघाला पहिला धक्का बसला. प्रियांशने ८ धावा केल्या. यानंतर, कर्णधार श्रेयस अय्यरने प्रभसिमरन सिंगला चांगली साथ दिली आणि संघाला विजयाकडे नेले. दरम्यान, प्रभसिमरन ६९ धावा करून बाद झाला. यानंतर, नेहरा वाढेरा आणि श्रेयसने २२ चेंडू शिल्लक असताना संघाला विजय मिळवून दिला. श्रेयसने ५२ धावांची नाबाद खेळी केली, तर नेहल वधेराने ४३ धावांची नाबाद खेळी केली.
लखनौकडून दिग्वेश राठी हा एकमेव यशस्वी गोलंदाज होता ज्याने दोन विकेट्स घेतल्या.
तत्पूर्वी, नाणेफेक गमावून फलंदाजीला आल्यानंतर लखनौ संघाची सुरुवात खराब झाली. डावाच्या पहिल्याच षटकात सलामीवीर मिचेल मार्श शून्यावर बाद झाला. नंतर, चौथ्या षटकात एडेन मार्कराम (२८ धावा) आणि पाचव्या षटकात कर्णधार ऋषभ पंत (०२ धावा) बाद झाले. त्यानंतर निकोलस पूरनने आयुष बदोनीसोबत ५४ धावांची भागीदारी करून संघाला पुन्हा ट्रॅकवर आणण्याचा प्रयत्न केला. तथापि, पूरनला त्याचे अर्धशतक पूर्ण करता आले नाही आणि तो ४४ धावांच्या वैयक्तिक धावसंख्येवर बाद झाला. बदोनीने डेव्हिड मिलर (१९ धावा) आणि अब्दुल समद (२७ धावा) सोबत छोट्या भागीदारी करून संघाचा धावसंख्या १७१ पर्यंत नेला. बदोनीने ४१ धावांची शानदार खेळी केली.
पंजाबकडून अर्शदीप सिंगने सर्वाधिक ३ विकेट्स घेतल्या. तर लोकी फर्ग्युसन, ग्लेन मॅक्सवेल, मार्को जानसेन आणि युजवेंद्र चहल यांना प्रत्येकी एक यश मिळाले.
