“पटौदीचं वाघाचं पोरं… अजूनही अजरामर!”
इंग्लंडचा युवा कर्णधार जेकब बेथेलसुद्धा तोडू शकला नाही भारताचा सर्वात तरुण कर्णधाराचा विक्रम
नवी दिल्ली, १६ ऑगस्ट (आयएएनएस) – इंग्लंड क्रिकेट संघाने आयर्लंडविरुद्धच्या तीन टी२० सामन्यांच्या मालिकेसाठी जेकब बेथेलला कर्णधारपद दिलं आहे. बेथेल इंग्लंडचा सर्वात तरुण कर्णधार ठरणार आहे. पण, भारताच्या क्रिकेट इतिहासातला सर्वात तरुण कर्णधार अजूनही मन्सूर अली खान पटौदीच राहतो.
जेव्हा जेकब बेथेल आयर्लंडविरुद्ध पहिल्या टी२० सामन्यात मैदानात उतरेल तेव्हा तो इंग्लंडचा सर्वात तरुण कर्णधार असेल; वय फक्त २१ वर्ष. याआधी इंग्लंडसाठी १८८९ मध्ये मोंटी बोडेन २३ वर्षांचा असताना कर्णधार बनला होता.
पण भारतीय संघासाठी २१ वर्षे ७७ दिवसाच्या वयात कर्णधार झालेला खेळाडू म्हणजे मन्सूर अली खान पटौदी! सचिन तेंडुलकर २३, कपिल देव २४, रवि शास्त्री आणि शुभमन गिल २५ व्या वर्षी कर्णधार झाले, पण पटौदीचं नाव अजूनही विक्रमांच्या यादीत अव्वल आहे.
बेथेलला २१ वर्षे २९६ दिवसांनी कर्णधारपद मिळालं आहे, तर पटौदी फक्त २१ वर्षे ७७ दिवसांचा असताना भारतीय टेस्ट संघाचा कर्णधार झाला होता. टी२० आणि टेस्ट कर्णधारपदाची जबाबदारी वेगळी असली तरी टेस्ट कर्णधारपद अधिक अवघड मानलं जातं. याच कारणामुळे पटौदीचा विक्रम आजही ‘वाघा’सारखा भक्कम आहे.
पटौदीने १९६१ ते १९७५ या काळात भारतासाठी ४६ टेस्ट सामने खेळले. त्यात त्याने ६ शतकं, १६ अर्धशतकं ठोकली आणि एकूण २,७९३ धावा केल्या. त्याचा सर्वोच्च स्कोअर नाबाद २०३ धावा होता. कर्णधार म्हणून त्याने ४० टेस्टमध्ये नेतृत्व केलं; त्यात भारताने ९ विजय, १९ पराभव तर १२ सामने बरोबरीत सोडले.