“पाकिस्तानमध्ये असे काहीही नाही जे भारतीय सैन्याच्या आवाक्याबाहेर आहे”

भारतात दहशतवादी हल्ले करणाऱ्या दहशतवादी गटांना पाठिंबा दिल्याबद्दल जम्मू आणि काश्मीरचे उपराज्यपाल मनोज सिन्हा यांनी पाकिस्तानला खडेबोल सुनावले आहेत. त्यांनी पाकिस्तानला इशारा देत म्हटले की, शेजारील देशात असे काहीही नाही जे भारतीय सशस्त्र दलांच्या आवाक्याबाहेर आहे. “संपूर्ण जगाने भारतीय सशस्त्र दलांचे शौर्य पाहिले आहे आणि नंतर पाकिस्तानने जगभर विनवणी करायला सुरुवात केली की आम्ही कधीही युद्धाच्या बाजूने नव्हतो. आम्हाला शांततेत राहायचे आहे,” असे मनोज सिन्हा जम्मू आणि काश्मीरमधील तंगधार सेक्टरमध्ये नियंत्रण रेषेवर तैनात असलेल्या लष्करी जवानांशी बोलताना म्हणाले.

मनोज सिन्हा म्हणाले की, “आज, आपण जगातील पाचवी सर्वात मोठी अर्थव्यवस्था आहोत आणि काही दिवसांत चौथी सर्वात मोठी अर्थव्यवस्था बनू इच्छितो. विकसित भारताचे स्वप्न घेऊन आपण पुढे जात आहोत. आपला शेजारी देश कर्जाच्या बळावर मानवतेचा नाश करण्याचा प्रयत्न करत आहे. भारताने दिलेल्या उत्तरातून त्यांनी धडा घेतला असेल. पाकिस्तानमध्ये असे काहीही नाही जे भारतीय सैन्याच्या आवाक्याबाहेर आहे,” असे म्हणत त्यांनी जवानांच्या शौर्याला सलाम केला.

मनोज सिन्हा यांनी तंगधार सेक्टरमधील सीमावर्ती भागाला भेट दिली आणि सीमेपलीकडून होणाऱ्या गोळीबारामुळे झालेल्या नुकसानीचा आढावा घेतला. प्रशासनाच्या मूल्यांकनानुसार, शक्य तितकी तात्काळ मदत पुरवण्यात आली आहे. काही लोकांचे पुनर्वसन होणे बाकी आहे. विभागीय आयुक्त काश्मीर आणि वरिष्ठ अधिकारी संयुक्तपणे झालेल्या नुकसानासाठी एक व्यापक योजना तयार करतील. या आधारे, भारत सरकारला विनंती करून उर्वरित लोकांचे पुनर्वसन करू, असा विश्वास त्यांनी व्यक्त केला.

हेही वाचा..

शशी थरूर यांना शिष्टमंडळाच्या नेतृत्वाची जबाबदारी मिळताच काँग्रेसची आगपाखड

देशविरोधी कारवाया प्रकरणी हरियाणामधील ट्रॅव्हल ब्लॉगर महिलेला अटक

नोएडात दोन नायजेरियन नागरिकांना अटक

दुर्गमध्ये दोन बांग्लादेशी नागरिकांना अटक

दरम्यान, मदत कार्याचा एक भाग म्हणून, लष्कराच्या जवानांनी पीडित रहिवाशांना औषधे आणि रेशनसह आवश्यक वस्तूंचे वाटप केले, तसेच त्यांच्या गरजा समजून घेण्यासाठी त्यांच्याशी संवाद साधला. एका स्थानिक रहिवाशाने सांगितले की, “आमच्या भागात गोळीबाराचा परिणाम झाला. भारतीय सैन्याने सीमेवर खूप महत्त्वाची भूमिका बजावली आहे आणि ते आम्हाला मदत साहित्य पुरवत आहेत. आम्ही भारतीय सैन्याचे आभार मानतो. आम्ही भारतीय सैन्याच्या पाठीशी उभे आहोत.”