टाटा समूहाच्या नेतृत्वाबाबत मोठी बातमी समोर आली आहे. टाटा सन्सचे कार्यकारी अध्यक्ष एन. चंद्रशेखरन यांना आणखी पाच वर्षांची मुदत देण्याच्या प्रस्तावाला टाटा सन्सच्या संचालक मंडळाने गुरुवारी मंजुरी दिली. त्यामुळे सध्या सुरू असलेला त्यांचा कार्यकाळ संपल्यानंतरही ते टाटा समूहाच्या होल्डिंग कंपनीचे नेतृत्व करत राहणार आहेत. काही दिवसांपूर्वी चंद्रशेखरन यांच्या पुढील कार्यकाळाबाबत अनिश्चितता निर्माण झाली होती. मात्र, आता संचालक मंडळाच्या निर्णयामुळे त्यांच्या नेतृत्वाला पुढील पाच वर्षांसाठी मुदतवाढ मिळण्याचा मार्ग मोकळा झाला आहे.
एन. चंद्रशेखरन हे टाटा समूहातील महत्त्वाचे नेतृत्व मानले जातात. त्यांच्या नेतृत्वाखाली समूहाने विविध क्षेत्रांमध्ये विस्तार करण्यावर भर दिला आहे. आता त्यांच्या नव्या कार्यकाळात टाटा सन्सच्या भविष्यातील धोरणांबरोबरच कंपनीच्या प्रस्तावित आयपीओकडेही विशेष लक्ष असणार आहे. टाटा सन्स ही टाटा समूहाची प्रमुख होल्डिंग कंपनी आहे. त्यामुळे तिच्या शेअर बाजारातील संभाव्य नोंदणीचा निर्णय हा समूहासाठी महत्त्वाचा टप्पा ठरणार आहे. मिळालेल्या माहितीनुसार, टाटा सन्सने कंपनीला शेअर बाजारात सूचीबद्ध करण्याची प्रक्रिया सुरू केली आहे आणि या प्रक्रियेत चंद्रशेखरन यांची भूमिका महत्त्वाची राहणार आहे.
हे ही वाचा:
मोदींच्या वाढदिवसानिमित्त क्रीडा क्षेत्राकडून शुभेच्छांचा वर्षाव
पावसाने चीनला रोखलं, बांगलादेशला उपांत्य फेरीचं तिकीट!
थायलंडला हरवून पाकिस्तान उपांत्य फेरीत
युपीआयवरून ओमर अब्दुल्लांचा राहुल गांधींना चिमटा
विशेष म्हणजे, काही दिवसांपूर्वी चंद्रशेखरन यांनी पदावरून बाजूला होण्याची शक्यता निर्माण झाली होती. त्यामुळे टाटा समूहाच्या पुढील नेतृत्वाबाबत चर्चा सुरू झाली होती. मात्र, आता पाच वर्षांची मुदतवाढ मंजूर झाल्याने या चर्चांना तात्पुरता विराम मिळाला आहे. त्यांच्या नव्या कार्यकाळात टाटा सन्सच्या व्यवसायाची दिशा, समूहातील कंपन्यांमधील समन्वय आणि आयपीओची तयारी हे महत्त्वाचे विषय असतील. मात्र, टाटा सन्समध्ये मोठी हिस्सेदारी असलेल्या काही टाटा ट्रस्टकडून त्यांच्या पुनर्नियुक्तीला आव्हान दिले जाऊ शकते, असेही वृत्तात नमूद करण्यात आले आहे. त्यामुळे पुढील काळात टाटा समूहातील नेतृत्वाचा हा विषय पुन्हा चर्चेत येण्याची शक्यता आहे.
