बॉलिवूड अभिनेता टायगर श्रॉफवर रविवारी संध्याकाळी मुंबईतील जुहू परिसरात गोळीबार करण्यात आल्याची घटना घडली. मोटारसायकलवरून आलेल्या तीन जणांनी त्याच्या गाडीवर गोळीबार केला. या घटनेत टायगर श्रॉफ सुखरूप आहे. मात्र, त्याचा चालक आणि एका रिक्षाचालकाला दुखापत झाली असून, पोलिसांनी या घटनेची माहिती दिली आहे.
या घटनेनंतर परिसरात एकच खळबळ उडाली. हल्लेखोर मोटारसायकलवरून आले आणि गोळीबार केल्यानंतर घटनास्थळावरून पसार झाल्याचे सांगण्यात येत आहे. पोलिसांनी प्रकरणाचा तपास सुरू केला असून, हल्लेखोरांचा शोध घेतला जात आहे.
बिश्नोई टोळीने घेतली जबाबदारी
दरम्यान, या हल्ल्याची जबाबदारी बिश्नोई टोळीने घेतल्याचा दावा सोशल मीडियावरील एका पोस्टमधून करण्यात आला आहे. बिश्नोई टोळीशी संबंधित असल्याचा दावा करणाऱ्या अनिल पंडित नावाच्या व्यक्तीच्या सोशल मीडिया पोस्टमध्ये त्याने अनिल हरमन संधूसोबत मिळून हा हल्ला केल्याचे म्हटले आहे. या कथित पोस्टमध्ये, “आम्ही त्याला फोन करून गोष्टी समजावून सांगण्याचा प्रयत्न केला होता; मात्र त्याला समजले नाही. त्यामुळे आज आम्ही त्याला योग्य पद्धतीने समजावून सांगितले,” असा दावा करण्यात आला आहे.
हे ही वाचा:
रणजी ट्रॉफी क्रिकेटमध्ये रिंकू सिंहचे सलग दुसरे शतक
अराजकवाद्यांमुळे फ्रान्स, इटलीत वणवा
रशियन तेलाच्या इंधन निर्यातीत भारताची मोठी झेप
गोव्यात ३०० कॉक्रोच आंदोलकांवर गुन्हे
तसेच, मुंबईतील चित्रपटसृष्टीतील जे लोक आमचे म्हणणे ऐकणार नाहीत किंवा सलमान खानसोबत काम करतील, ते पुढचे लक्ष्य असतील, अशी धमकीही या पोस्टमध्ये देण्यात आल्याचा आरोप आहे. मात्र, सोशल मीडिया पोस्टमधील या दाव्यांची पोलिसांकडून अधिकृत पुष्टी झालेली नाही. त्यामुळे हल्ल्यामागे नेमके कोण होते आणि त्यामागील कारण काय होते, हे तपासातून स्पष्ट होणे बाकी आहे.
ऍक्शन, नृत्य आणि स्टंट्ससाठी टायगर श्रॉफ विशेष प्रसिद्ध आहे. त्याच्या ऍक्शनपटांमुळे त्याची बॉलिवूडमध्ये स्वतंत्र ओळख निर्माण झाली आहे. दरम्यान, जुहूतील गोळीबाराच्या घटनेचा मुंबई पोलिसांकडून तपास सुरू असून, हल्लेखोरांची ओळख आणि हल्ल्यामागील नेमके कारण शोधण्याचे प्रयत्न सुरू आहेत.
