पाकिस्तानच्या बलुचिस्तान प्रांतातील नौश्की येथे पाकिस्तानी सुरक्षा दलांच्या चौक्यांवर रॉकेट हल्ला करण्यात आला. तसेच अनेक ठिकाणी गोळीबारही झाला. मस्तुंगमधील लष्करी छावणीवर आत्मघातकी हल्ला झाल्यानंतर दुसऱ्याच दिवशी ही घटना घडली.
शुक्रवारी नौश्की येथील फुटबॉल स्टेडियमजवळ आणि अन्य ठिकाणी लष्करी चौक्यांना रॉकेट व इतर शस्त्रांनी लक्ष्य करण्यात आले. परिसरात गोळीबार आणि स्फोटांचे आवाज ऐकू आल्यानंतर अनेक दुकानदारांनी दुकाने बंद केली. स्टेडियम परिसरात तसेच सुरक्षा दलांच्या चौकीजवळ गोळीबार झाल्याची माहिती पोलिसांनी दिली.
दरम्यान, गुरुवारी रात्री क्वेटा येथील सरियाब परिसरात नव्या पोलीस ठाण्याजवळही स्फोट झाला. मस्तुंगमधील लष्करी छावणीवर स्फोटकांनी भरलेला ट्रक धडकवून आत्मघातकी हल्ला करण्यात आला होता. या हल्ल्याची जबाबदारी बलुच लिबरेशन आर्मीने (बीएलए) स्वीकारली असून, त्यात १८ पाकिस्तानी सुरक्षा कर्मचारी मारले गेल्याचा दावा केला आहे. मात्र, या दाव्याला स्वतंत्र दुजोरा मिळालेला नाही.
हे ही वाचा:
तीन वर्षांनंतर पाकिस्तानी मंत्री भारत दौऱ्यावर
हनीट्रॅपमध्ये अडकला हवाई दलाचा अधिकारी
देव दीपावलीसाठी ११ लाख दिव्यांनी उजळणार काशी
दिवाळीत फटाक्यांवरून मुंबईत ८० हून अधिक गुन्हे दाखल
या आठवड्यात मस्तुंग आणि कलात जिल्ह्यांत पाकिस्तानी सुरक्षा दलांना लक्ष्य करून ड्रोन आणि आयईडी हल्लेही झाले. मस्तुंगमध्ये दोन ड्रोनद्वारे लष्करी छावणीवर हल्ला करण्यात आला, तर कलातमध्ये आयईडी स्फोटात सुरक्षा दलांचे वाहन उद्ध्वस्त झाले. या घटनांनंतर बलुचिस्तानमधील संवेदनशील ठिकाणांची सुरक्षा वाढवण्यात आली आहे.
