उत्तर प्रदेशातील रामपूर येथे समाजवादी पक्षाचे नेते आणि माजी मंत्री आझम खान यांच्याशी संबंधित मोहम्मद अली जौहर विद्यापीठावर अंमलबजावणी संचालनालयाने (ईडी) मोठी कारवाई केली आहे. कथित मनी लाँडरिंग प्रकरणाच्या तपासादरम्यान विद्यापीठाच्या जमीन आणि इमारतींचा समावेश असलेल्या मालमत्तेवर जप्तीची कारवाई करण्यात आली आहे. या मालमत्तेचे बाजारमूल्य सुमारे १ हजार १७० कोटी रुपये असल्याचे सांगण्यात येत असून, ईडीने ४२६.४६ कोटी रुपयांच्या मालमत्तेवर तात्पुरती टाच आणली आहे. आझम खान, मौलाना मोहम्मद अली जौहर ट्रस्ट आणि अन्य संबंधित व्यक्तींच्या भूमिकेचा तपास या प्रकरणात केला जात आहे.
ईडीच्या तपासानुसार, विद्यापीठाच्या उभारणीसाठी शेतकऱ्यांची जमीन कथितरीत्या बळजबरीने ताब्यात घेण्यात आल्याचे आरोप आहेत. यासंदर्भात रामपूरमधील अजीमनगर पोलीस ठाण्यात दाखल झालेल्या २६ गुन्ह्यांच्या आधारे तपास सुरू करण्यात आला. याशिवाय, सिंहनखेडा गावातील सुमारे ३४ एकर क्षेत्रावरील शत्रू संपत्तीच्या ४५ भूखंडांवर बेकायदेशीररीत्या ताबा मिळवून त्यांचा विद्यापीठासाठी वापर करण्यात आल्याचाही आरोप आहे. संबंधित जमिनीचा भाडेपट्टा रद्द झाल्यानंतरही तिचा वापर सुरू ठेवल्याचा दावा तपास यंत्रणेने केला आहे. या प्रकरणात सरकारी मालमत्तेचा वापर आणि जमीन हस्तांतरणाच्या प्रक्रियेतील कथित अनियमिततांचीही चौकशी केली जात आहे.
हे ही वाचा:
“प्रत्येक गोष्टीत राजकारण करु नका”
‘अर्णब’ चक्रीवादळाचा आंध्र प्रदेश-ओडिशाला तडाखा
सरन्यायाधीशांवरील वादग्रस्त पोस्टप्रकरणी केरळ काँग्रेसचा माफीनामा
अनाहतच्या आगेकूचला ब्रेक; दुखापतीमुळे माघार!
विद्यापीठाच्या बांधकामासाठी सरकारी निधी आणि कंत्राटांच्या माध्यमातून मिळालेल्या पैशांचा कथित गैरवापर झाल्याचा संशयही ईडीने व्यक्त केला आहे. सुमारे १८६ कोटी रुपयांची सरकारी बांधकाम कंत्राटे मिळवणाऱ्या एका कंपनीच्या व्यवस्थापकीय संचालकाने कंत्राटाच्या रकमेतून ३० ते ४० टक्के निधी विद्यापीठासाठी बांधकाम साहित्य खरेदी करण्यासाठी वापरल्याचे सांगितल्याचा दावा तपास यंत्रणेने केला आहे. तसेच, आमदार आणि विधान परिषद सदस्यांच्या स्थानिक विकास निधीतून सुमारे ६.६० कोटी रुपयांची कामे विद्यापीठाच्या खासगी परिसरात करण्यात आल्याचेही तपासात समोर आल्याचे ईडीने म्हटले आहे. या व्यवहारांमधील आर्थिक स्रोत आणि निधीचा प्रत्यक्ष वापर यांची पडताळणी केली जात आहे.
ईडीच्या मते, विद्यापीठ परिसरातील ५९ इमारतींचे बांधकाम आणि जमिनीचे एकत्रित मूल्य सुमारे ४९९.०९ कोटी रुपये आहे. मात्र, ट्रस्टने दाखवलेल्या खर्चाची आणि देणग्यांची तपासणी केल्यानंतर केवळ ७२.६३ कोटी रुपयांच्या खर्चाचे वैध स्रोत स्पष्ट झाल्याचा दावा तपास यंत्रणेने केला आहे. उर्वरित ४२६.४६ कोटी रुपयांची रक्कम कथित गुन्ह्यातून प्राप्त झालेली असल्याचा संशय व्यक्त करत संबंधित मालमत्तेवर तात्पुरती जप्ती आणण्यात आली आहे. या कारवाईमुळे आझम खान यांच्याशी संबंधित विद्यापीठ पुन्हा चर्चेत आले आहे. मात्र, ईडीने केलेले आरोप हे तपासातील दावे असून, त्यावर न्यायालयीन प्रक्रियेत अंतिम निर्णय होणे बाकी आहे
