बॉलिवूड अभिनेता टायगर श्रॉफ याच्याशी संबंधित गोळीबार प्रकरणात पोलिसांनी तपासाचा वेग वाढवला असून, अटक करण्यात आलेल्या रेहान ऊर्फ सुक्का (१८), ऋतिक कुमार ऊर्फ रोशन (२२) आणि फूल सिंग (१८) या तिन्ही आरोपींना मुंबईतील किला न्यायालयाने ३१ ऑक्टोबरपर्यंत पोलीस कोठडी सुनावली आहे. या कालावधीत आरोपींची सखोल चौकशी करून गोळीबाराच्या घटनेमागील नेमके कारण, हल्ल्यासाठी वापरण्यात आलेल्या शस्त्रांचा स्रोत आणि या प्रकरणातील अन्य व्यक्तींचा सहभाग यांचा शोध घेतला जाणार आहे. १८ ऑक्टोबर रोजी संध्याकाळच्या सुमारास मुंबईतील जुहू परिसरात ही गोळीबाराची घटना घडली होती. या प्रकरणात यापूर्वी अटक करण्यात आलेल्या तिन्ही आरोपींकडून महत्त्वाची माहिती मिळवण्याचा प्रयत्न पोलीस करत आहेत.
दरम्यान, या प्रकरणात शस्त्रांचा पुरवठा करणे आणि गोळीबारानंतर आरोपींना पळून जाण्यास मदत केल्याच्या संशयावरून दिल्ली पोलिसांच्या स्पेशल सेलने आणखी चार जणांना अटक केली आहे. कुणाल (२१) आणि सुमित (१९) हे हरियाणातील सोनीपत जिल्ह्यातील रहिवासी असून, राधा (२३) ही उत्तर प्रदेशातील सीतापूर येथील, तर बबिता (२३) ही आझमगड येथील रहिवासी असल्याची माहिती समोर आली आहे. या चौघांची भूमिका तपासाच्या दृष्टीने महत्त्वाची मानली जात आहे. अमृतसरहून मुंबईपर्यंत पिस्तूल आणि काडतुसे पोहोचवण्याची कथित व्यवस्था कोणी केली, त्यासाठी मध्यस्थांची मदत घेण्यात आली होती का आणि घटनेनंतर आरोपींना मुंबईबाहेर जाण्यास कोणी मदत केली, या दिशेने तपास सुरू आहे.
हे ही वाचा:
दिवाळीपुर्वी मागण्या मान्य न झाल्यास आंदोलनाचा इशारा
‘रामायण’ची ऍडव्हान्स बुकिंगमध्ये ४.८८ कोटींची कमाई
ज्ञानेश कुमारांविरोधातील आंदोलनाची हवा सोशल मीडियावर मंदावली?
ज्ञानेशकुमार प्रकरणावर बोलण्यास रुबिओंचा स्पष्ट नकार
पोलिसांच्या प्राथमिक तपासानुसार, कुणाल नुकताच जामिनावर तुरुंगातून बाहेर आला होता. त्यानंतर एका मित्राच्या माध्यमातून त्याची अनिल पंडित याच्याशी ओळख झाली. पुढे दोघेही एन्क्रिप्टेड मेसेजिंग ॲपच्या माध्यमातून संपर्कात असल्याचा आरोप आहे. अनिल पंडितच्या सांगण्यावरून कुणाल अमृतसरहून एक पिस्तूल आणि २० काडतुसे घेऊन आल्याचा पोलिसांचा संशय आहे. या प्रवासात सुमितही त्याच्यासोबत असल्याचे सांगितले जाते. कुणालने घटनेच्या सुमारे दोन महिने आधी राधाची भेट घेतली होती. त्यानंतर त्याने राधाला आपल्या हालचालींची माहिती दिली आणि शस्त्र घेऊन मुंबईला येण्यासाठी तिला तयार केल्याचा आरोप आहे. या संपूर्ण साखळीत आणखी कोणाचा सहभाग होता, याचा तपास यंत्रणा करत आहेत.
तपासात समोर आलेल्या माहितीनुसार, १५ ऑक्टोबर रोजी कुणाल राधा आणि बबिता यांना नवी दिल्ली रेल्वे स्थानकावर घेऊन गेला होता. यावेळी पिस्तूल राधाच्या बॅगेत ठेवण्यात आल्याचा पोलिसांचा संशय आहे. त्यानंतर १७ ऑक्टोबर रोजी राधा आणि बबिता मुंबईतील दादर येथे पोहोचल्या आणि एका हॉटेलमध्ये थांबल्या. त्याच दिवशी सकाळी सुमारे ११ वाजण्याच्या सुमारास हॉटेलजवळ एका अल्पवयीन मुलाने राधाची बॅग घेतल्याचे तपासात समोर आले आहे. या बॅगेतील शस्त्र पुढे कोणाच्या ताब्यात गेले, ते गोळीबाराच्या घटनेत कसे वापरण्यात आले आणि या संपूर्ण कटामागे आणखी कोणत्या व्यक्तींचा हात आहे, याचा शोध पोलीस घेत आहेत. त्यामुळे टायगर श्रॉफ गोळीबार प्रकरणातील शस्त्रपुरवठा, आरोपींचे परस्पर संबंध आणि हल्ल्यामागील संभाव्य सूत्रधार यांचा उलगडा करण्याच्या दृष्टीने पुढील चौकशी महत्त्वाची ठरणार आहे.
