अमेरिकेचे अध्यक्ष डोनाल्ड ट्रम्प यांनी जगभरातील अनेक देशांना दणका देत नवीन आयात शुल्क लागू केले आहे. भारतासह अनेक देशांना याची झळ बसली असून या धोरणामुळे जगभरातील अनेक देशांच्या शेअर बाजारांवर मोठे परिमाण झाल्याचं पाहायला मिळालं. चीनवर मात्र विशेष निशाणा साधत अमेरिकेने चिनी वस्तूंवर १०४ टक्के आयात शुल्क लावले आहे. ट्रम्प प्रशासनाच्या या निर्णयानंतर दणका बसलेल्या चीनला आता भारताची आठवण आली आहे.
अमेरिकेचे अध्यक्ष डोनाल्ड ट्रम्प यांच्या प्रशासनाने लादलेल्या शुल्कामुळे निर्माण झालेल्या आव्हानांवर मात करण्यासाठी भारत आणि चीनने एकत्र उभे राहिले पाहिजे, असे भारतातील चिनी दूतावासाच्या प्रवक्त्याने मंगळवारी सांगितले. चिनी दूतावासाच्या प्रवक्त्या यू जिंग यांनी एक्सवर एक पोस्ट लिहिली आहे. या पोस्टमध्ये त्यांनी म्हटलं आहे की, “ट्रम्प प्रशासनाने लादलेल्या आयात शुल्कामुळे निर्माण झालेल्या आव्हानांना तोंड देण्यासाठी भारत आणि चीनने एकत्र आलं पाहिजे. चीन-भारत आर्थिक व्यापारी संबंध परस्पर फायद्यांवर आधारित आहेत. अमेरिका आयात शुल्काचा गैरवापर करत असल्याने आपल्यासमोर अडचणी उभ्या राहिल्या आहेत. या अडचणींना तोंड देण्यासाठी विकसनशील देशांनी एकत्र उभं राहिलं पाहिजे.”
एका सविस्तर निवेदनात, प्रवक्त्याने म्हटले आहे की, चीनची आर्थिक शक्ती त्याच्या व्यापक औद्योगिक प्रणाली आणि नवोन्मेष आणि संशोधनावर सतत लक्ष केंद्रित करण्यामुळे निर्माण होते. चीनची अर्थव्यवस्था स्थिर वाढ सुनिश्चित करणारी आणि सकारात्मक परिणाम निर्माण करणारी प्रणालीवर आधारित आहे. चिनी उत्पादन संपूर्ण आणि सतत अपग्रेड होणारी औद्योगिक प्रणाली, संशोधन आणि विकासात शाश्वत गुंतवणूक आणि नवोपक्रमावर भर देण्यावर आधारित आहे. चीन हा आर्थिक जागतिकीकरण आणि बहुपक्षीयतेचा खंबीर समर्थक आहे, ज्याने जागतिक अर्थव्यवस्थेत जोरदार चालना दिली आहे, दरवर्षी सरासरी जागतिक वाढीच्या सुमारे 30 टक्के योगदान दिले आहे. जागतिक व्यापार संघटनेच्या (WTO) केंद्रस्थानी असलेल्या बहुपक्षीय व्यापार प्रणालीचे रक्षण करण्यासाठी आम्ही उर्वरित जगासोबत काम करत राहू, असे यू म्हणाल्या.
“अमेरिकेकडून होणाऱ्या शुल्काच्या गैरवापराला तोंड देत, ज्यामुळे देशांना, विशेषतः ग्लोबल साउथ देशांना, विकासाच्या अधिकारापासून वंचित ठेवले जाते, तेव्हा दोन सर्वात मोठ्या विकसनशील देशांनी अडचणींवर मात करण्यासाठी एकत्र उभे राहिले पाहिजे,” असे यू पुढे म्हणाल्या.
हे ही वाचा :
पुण्यात भूतानच्या तरुणीवर अत्याचार; राष्ट्रवादी काँग्रेसच्या माजी पदाधिकाऱ्याला अटक
बंगाल की बांगलादेश? वक्फविरोधात मुर्शिदाबाद पेटले
पुनर्वास एज्युकेशन सोसायटीतर्फे गुरुवारी जागतिक होमिओपॅथी दिन
पुण्यात सलूनमध्ये तरुणीचे धर्मांतर; चालकाला चोप!
राष्ट्राध्यक्ष ट्रम्प यांनी यापूर्वी सर्व राष्ट्रांवर १० टक्के आयात शुल्क आणि विशिष्ट देशांमधून येणाऱ्या वस्तूंवर खूपच जास्त कर लादले होते, ज्यामध्ये भारतीय निर्यातीवर २७ टक्के कर समाविष्ट होता. मात्र, ट्रम्प यांनी मंगळवार, ८ एप्रिलच्या मध्यरात्रीपासून लागू होणाऱ्या सर्व चिनी आयातींवर १०४ टक्के कर लादण्याची घोषणा केल्याने तणाव आणखी वाढला, असे व्हाईट हाऊसने म्हटले आहे. ट्रम्प यांनी चीनला अमेरिकेच्या वस्तूंवरील ३४ टक्के कर मागे घेण्यासाठी २४ तासांचा वेळ दिला होता. प्रत्युत्तरादाखल, चीनने शेवटपर्यंत लढण्याची शपथ घेतली असून आपल्या आर्थिक हितांचे रक्षण करण्यासाठी प्रतिउपाय करण्याचे आश्वासन दिले.
