जर्मनीच्या उत्तरेकडील स्टाड शहरातील एका युवक कल्याण केंद्रात सोमवारी झालेल्या गोळीबारात चार महिला आणि दोन पुरुषांचा मृत्यू झाला, अशी माहिती पोलिसांनी दिली. स्टाड पोलिसांच्या माहितीनुसार, या गोळीबारात अनेक जण जखमी झाले आहेत. घटनास्थळी पाच जणांचा मृत्यू झाला, तर गंभीर जखमी झालेल्या आणखी एका व्यक्तीचा रुग्णालयात उपचारादरम्यान मृत्यू झाला. मृत्यू झालेल्या सर्व व्यक्ती प्रौढ होत्या.
पोलिस अधिकाऱ्यांनी सांगितले की, मृत व्यक्ती या केंद्रातील कर्मचारी होते, रहिवासी नव्हते. गोळीबारानंतर काही वेळातच पोलिसांनी ४५ वर्षीय तुर्की वंशाच्या एका पुरुषाला अटक केली. त्याचा जन्म जर्मनीतच झाला होता.
मुलीच्या पालकत्वाच्या वादातून गोळीबाराचा संशय
पोलिसांनी सांगितले की, या घटनेमागील कारणांचा तपास सुरू असून, प्राथमिक तपासात हा हल्ला कौटुंबिक वादाशी संबंधित असल्याचा संशय आहे. संशयित आपल्या तीन महिन्यांच्या मुलीच्या पालकत्वासंदर्भात युवक कल्याण केंद्रातील अधिकाऱ्यांसोबत बैठकीसाठी आला होता.
घटनेच्या वेळी त्याची तीन महिन्यांची मुलगी आणि तिची ३४ वर्षीय आई घटनास्थळी उपस्थित होते. गोळीबारानंतर मुलीचा ताबा युवक कल्याण विभागाकडे देण्यात आला असून, मुलीची आई सध्या पोलिसांच्या देखरेखीखाली आहे.
याशिवाय, संशयिताला पळून जाण्यास मदत केल्याच्या संशयावरून ६५ वर्षीय एका महिलेलाही ताब्यात घेण्यात आले आहे. पोलिसांच्या मते, ती संशयिताच्या कुटुंबाशी जवळून संबंधित आहे आणि तिने पळून जाण्यासाठी वाहन उपलब्ध करून दिले होते.
अफवांपासून सावध राहण्याचे आवाहन
पोलिसांनी संपूर्ण परिसर रिकामा करून सुरक्षित केला असून, सध्या नागरिकांना कोणताही धोका नसल्याचे स्पष्ट केले आहे. तसेच नागरिकांना त्या परिसरात जाणे टाळण्याचे आवाहन करण्यात आले आहे. जर्मनीचे राष्ट्राध्यक्ष फ्रँक-वाल्टर स्टाइनमायर आणि चान्सलर फ्रेडरिक मर्झ यांनी या घटनेबद्दल दुःख व्यक्त करत मृतांच्या कुटुंबीयांप्रती संवेदना व्यक्त केल्या. तसेच त्यांनी बचावकार्य करणाऱ्या आपत्कालीन सेवांचे आभार मानले.
हे ही वाचा:
सोन्याची चमक फिकी, चांदीचीही मोठी घसरण!
अवघ्या ३ महिन्यांत भारतीयांनी विकले तब्बल ५० टन जुने सोने!
“आमचे राजकारण तोडण्यासाठी नव्हे, तर जोडण्यासाठी”
प्रचंड लाटा, जोरदार वाऱ्यांच्या तडाख्यात अडकली बोट, ६ मच्छिमार वाचले
शाळा आणि बालवाडी जवळच
स्थानिक नगरसेवक कार्स्टन ब्रोकेलमान यांनी सांगितले की, ज्या ठिकाणी गोळीबार झाला त्या परिसरातच शहराची बालवाडी आणि प्राथमिक शाळा आहे. ते म्हणाले, “आमचे कर्मचारी आणि सर्व मुले सुरक्षित असल्याने आम्हाला दिलासा मिळाला आहे. या गोंधळाच्या परिस्थितीत उत्कृष्ट कामगिरी करणाऱ्या पोलिसांचे आम्ही आभार मानतो. त्याचवेळी या भीषण घटनेतील मृतांच्या कुटुंबीयांप्रती आमच्या मनःपूर्वक संवेदना आहेत.”
पोलिसांनी सांगितले की, या घटनेबाबत सोशल मीडियावर चुकीची माहिती आणि अफवा पसरवल्या जात आहेत. नागरिकांनी अशा अफवा पसरवू नयेत, कारण त्यामुळे तपासात अडथळा निर्माण होऊ शकतो.
जर्मनीतील बंदूक कायदे कडक
स्टाड हे हॅम्बुर्गपासून सुमारे ४५ किलोमीटर पश्चिमेला वसलेले, सुमारे ५० हजार लोकसंख्येचे ऐतिहासिक शहर आहे. जर्मनीमध्ये अशा प्रकारच्या सामूहिक गोळीबाराच्या घटना अत्यंत दुर्मिळ आहेत. देशात बंदूक बाळगण्यासाठी कठोर कायदे असून परवाना मिळवण्यासाठी अर्जदाराने विश्वासार्हता सिद्ध करणे, प्रशिक्षण पूर्ण करणे, परीक्षा उत्तीर्ण होणे आणि शस्त्राची आवश्यकता असल्याचे दाखवणे बंधनकारक आहे. जर्मन सरकारच्या आकडेवारीनुसार, ८.३ कोटी लोकसंख्येच्या देशात सुमारे ९.२९ लाख नागरिकांकडे ३० लाखांहून अधिक नोंदणीकृत बंदुका आहेत.
