राहुल गांधी यांच्या राजकीय पुनरागमनासाठी देशात जाळपोळ आणि अराजकता निर्माण करण्याचा प्रयत्न केला जात असल्याचा दावा भाजपाचे खासदार आणि राष्ट्रीय प्रवक्ते संबित पात्रा यांनी भुवनेश्वर येथे केला. भाजपच्या राज्य मुख्यालयात आयोजित पत्रकार परिषदेत पात्रा म्हणाले की, १ नोव्हेंबर रोजी प्रस्तावित आंदोलनांचा उद्देश जनतेने निवडून दिलेले सरकार अस्थिर करणे हा आहे.
“राहुल गांधींना पुन्हा राजकीयदृष्ट्या उभे करण्यासाठी देशात जाळपोळ आणि अराजकता पसरवण्याचा प्रयत्न केला जात आहे,” असा आरोप पात्रा यांनी केला. राहुल गांधी परदेशात जाऊन अब्जाधीश गुंतवणूकदार जॉर्ज सोरोस आणि त्यांच्या सहकाऱ्यांकडून भारतात अस्थिरता निर्माण करण्याचे आणि सरकार बदलण्याचे मार्ग शिकत असल्याचा गंभीर आरोपही त्यांनी केला.
“राहुल गांधी भारताचा नाश कसा करायचा, भारतात सत्ताबदल कसा घडवून आणायचा आणि या संपूर्ण प्रयत्नात कुठे कमी पडले, याचे प्रशिक्षण घेण्यासाठी सोरोस आणि त्यांच्या सहकाऱ्यांकडे परदेशात गेले आहेत,” असा दावा पात्रा यांनी केला. पात्रा यांनी अलीकडील आंदोलनांचाही उल्लेख केला. या आंदोलनांमागील लोकांना जनतेचा पाठिंबा मिळवण्यात अपयश आले असून आता नव्याने लोकांना एकत्र करून आपला अजेंडा पुढे नेण्याचा प्रयत्न केला जात असल्याचा आरोप त्यांनी केला.
हे ही वाचा:
माटुंग्याच्या आयसीटी वसतिगृहात विद्यार्थ्याची गळफास घेऊन आत्महत्या
मार्वे रोडवर शाळेसमोरची अवैध पार्किंग, अतिक्रमणे जीव गेल्यावरच हटणार का?
ज्ञानेशकुमार प्रकरणावर बोलण्यास रुबिओंचा स्पष्ट नकार
दीड वर्षांच्या चिमुकलीच्या मृत्यूप्रकरणी १० वर्षांच्या मुलीवर हत्येचा गुन्हा
१ नोव्हेंबर ही तारीख निवडण्यावरूनही पात्रा यांनी काँग्रेसवर निशाणा साधला. १ नोव्हेंबर १९८४ रोजी झालेल्या शीखविरोधी हिंसाचाराचा संदर्भ देत, काँग्रेसने पुन्हा रस्त्यावर उतरून सरकारला आव्हान देण्यासाठी ही तारीख निवडल्याचा आरोप त्यांनी केला. लोकशाही प्रक्रियेतून निवडून आलेले सरकार रस्त्यावरील आंदोलनांच्या माध्यमातून अस्थिर करण्याचा कथित प्रयत्न असल्याचे पात्रा म्हणाले.
तिरंगा म्हणजे अराजकता माजवण्याची परवानगी नाही
राष्ट्रध्वजाचा वापर आंदोलनासाठी केला जात असल्याच्या मुद्द्यावरही पात्रा यांनी जोरदार टीका केली.“तिरंगा हा भारताच्या सार्वभौमत्वाचे आणि स्वातंत्र्याचे प्रतीक आहे. त्याचा आधार घेऊन देशात अशांतता किंवा अराजकता निर्माण करण्याची कोणालाही मुभा मिळत नाही,” असे पात्रा यांनी म्हटले.
