एशियन गेम्स २०२६ मध्ये कांस्यपदक पटकावणाऱ्या भारतीय बॉक्सर नरेंद्र बेरवालने आता २०२८च्या लॉस एंजेलिस ऑलिम्पिकचे लक्ष्य निश्चित केले आहे. सुपर हेवीवेट गटात सलग दोन एशियन गेम्समध्ये पदक जिंकणारा तो पहिला भारतीय बॉक्सर ठरला आहे.
एशियन गेम्समधील यशानंतर हरियाणात मायदेशी परतलेल्या नरेंद्रचे उत्साहात स्वागत करण्यात आले. यावेळी प्रसारमाध्यमांशी संवाद साधताना त्याने आपल्या पुढील लक्ष्याबाबत माहिती दिली.
“मी एशियन गेम्स २०२६ मध्ये कांस्यपदक जिंकले. यापूर्वीच्या एशियन गेम्समध्येही मला कांस्यपदक मिळाले होते. सुपर हेवीवेट गटात सलग दोन एशियन गेम्समध्ये पदक जिंकणारा पहिला भारतीय बॉक्सर होण्याचा मान मला मिळाला आहे,” असे नरेंद्रने सांगितले.
नरेंद्रने जागतिक बॉक्सिंग चॅम्पियनशिपसाठी थेट पात्रता मिळवली आहे. पुढील वर्षी एप्रिलमध्ये कझाकिस्तानमध्ये होणाऱ्या या स्पर्धेत ऑलिम्पिक कोट्यासाठी महत्त्वाच्या लढती होणार आहेत. त्यामुळे या स्पर्धेत दमदार कामगिरी करून लॉस एंजेलिस २०२८ ऑलिम्पिकचे तिकीट मिळवण्याचे नरेंद्रचे लक्ष्य आहे.
भारतीय बॉक्सिंगची एशियाडमध्ये दमदार कामगिरी
एशियन गेम्स २०२६ मध्ये भारतीय बॉक्सर्सनी एकूण ६ पदकांची कमाई केली. यात ३ सुवर्ण आणि ३ कांस्यपदकांचा समावेश आहे. लवलीना बोरगोहेन, परवीन हुड्डा आणि अंकुश पंघाल यांनी सुवर्णपदक पटकावले, तर नरेंद्र बेरवाल, प्रिया घनघस आणि कपिल पोखरिया यांनी कांस्यपदक जिंकले.
भारतीय बॉक्सिंगच्या या कामगिरीबद्दल बॉक्सिंग फेडरेशन ऑफ इंडियाचे अध्यक्ष अजय सिंह यांनीही समाधान व्यक्त केले. भारताने बॉक्सिंगमध्ये उझबेकिस्तान, कझाकिस्तान आणि चीनसारख्या बलाढ्य देशांना मागे टाकत अव्वल स्थान मिळवले, ही अभिमानाची बाब असल्याचे त्यांनी सांगितले.
विशेष म्हणजे, यंदाच्या एशियाडमध्ये भारतीय बॉक्सर्सनी हेवीवेट गटातही आपली ताकद दाखवून दिली. त्यामुळे भारतीय बॉक्सिंगचा विस्तार केवळ लाइटवेटपुरता मर्यादित राहिलेला नसल्याचे स्पष्ट झाले आहे.
आता नरेंद्र बेरवालसमोर जागतिक चॅम्पियनशिप, ऑलिम्पिक कोटा आणि त्यानंतर लॉस एंजेलिसमध्ये देशासाठी पदक जिंकण्याचे मोठे लक्ष्य आहे. एशियाडच्या कांस्यपदकानंतर त्याचा हा पुढचा पंच किती ताकदीचा ठरतो, याकडे क्रीडाप्रेमींचे लक्ष लागले आहे.
