वनडे मालिकेच्या सुरुवातीलाच न्यूझीलंड क्रिकेट संघाला मोठा धक्का बसला आहे. संघातील महत्त्वाचे अष्टपैलू खेळाडू रचिन रविंद्र आणि फलंदाज मार्क चॅपमन दुखापतीमुळे संपूर्ण वनडे मालिकेतून बाहेर झाले आहेत. त्यामुळे आगामी मालिकेपूर्वी न्यूझीलंडच्या संघ व्यवस्थापनाची चिंता वाढली आहे.
रचिन रविंद्र खांद्याच्या दुखापतीतून अद्याप पूर्णपणे सावरलेले नाहीत. एका प्रमोशनल शूटदरम्यान झालेल्या घटनेत त्यांच्या उजव्या खांद्याचा सांधा निखळला होता. त्यामुळे त्यांना मैदानात पूर्ण क्षमतेने खेळण्यासाठी आणखी काही काळ विश्रांती आणि पुनर्वसनाची आवश्यकता आहे.
दुसरीकडे, मार्क चॅपमन यांनाही हॅमस्ट्रिंगच्या दुखापतीमुळे मालिकेला मुकावे लागणार आहे. युरोपियन टी-२० प्रीमियर लीगदरम्यान त्यांच्या डाव्या मांडीच्या स्नायूला दुखापत झाली होती. नुकत्याच झालेल्या एमआरआय तपासणीनंतर त्यांना पूर्णपणे तंदुरुस्त होण्यासाठी आणखी दोन आठवड्यांचे पुनर्वसन करावे लागणार असल्याचे न्यूझीलंड क्रिकेटने स्पष्ट केले आहे.
न्यूझीलंडचे मुख्य प्रशिक्षक रॉब वॉल्टर यांनी दोन्ही खेळाडूंच्या अनुपस्थितीबद्दल नाराजी व्यक्त केली. रचिन आणि मार्क हे संघासाठी अत्यंत महत्त्वाचे खेळाडू असल्याचे त्यांनी सांगितले. रचिनच्या खांद्याची दुखापत अद्याप पूर्णपणे बरी झालेली नाही. त्यामुळे महिन्याच्या अखेरीस होणाऱ्या कसोटी मालिकेचा विचार करून त्याच्या फिटनेसबाबत कोणताही अनावश्यक धोका पत्करायचा नसल्याचेही त्यांनी स्पष्ट केले.
संघात नव्या चेहऱ्यांना संधी
दोन्ही खेळाडूंच्या अनुपस्थितीत न्यूझीलंडने संघात काही महत्त्वाचे बदल केले आहेत. यष्टिरक्षक-फलंदाज टिम सीफर्टला पहिल्या तीन वनडे सामन्यांसाठी संधी देण्यात आली आहे. हेन्री निकोल्सचाही पहिल्या तीन सामन्यांसाठी संघात समावेश करण्यात आला आहे. तर अष्टपैलू डीन फॉक्सक्रॉफ्ट अखेरच्या दोन सामन्यांसाठी संघाशी जोडला जाणार आहे.
वेगवान गोलंदाज मॅट फिशरलाही पहिल्या तीन सामन्यांसाठी संघात स्थान देण्यात आले आहे. सुरुवातीला त्याची निवड केवळ अखेरच्या दोन सामन्यांसाठी करण्यात आली होती. दरम्यान, वेगवान गोलंदाज मॅट हेन्री सोमवारी (२ नोव्हेंबर) संघात दाखल होणार असून, त्याच्या फिटनेसचे मूल्यमापन केल्यानंतर खेळण्याबाबत निर्णय घेतला जाणार आहे. उजव्या मांडीच्या स्नायूला झालेल्या किरकोळ दुखापतीमुळे तो अखेरच्या तीन टी-२० सामन्यांना मुकला होता.
न्यूझीलंडचा वनडे संघ
पहिले तीन सामने : मिचेल सँटनर (कर्णधार), मायकेल ब्रेसवेल, डेव्हॉन कॉनवे, जेकब डफी, मॅट फिशर, मॅट हेन्री, काइल जेमिसन, टॉम लॅथम (यष्टिरक्षक), डॅरिल मिचेल, हेन्री निकोल्स, ग्लेन फिलिप्स, टिम सीफर्ट, नॅथन स्मिथ, विल यंग आणि ब्लेअर टिकनर.
शेवटचे दोन सामने : मिचेल सँटनर (कर्णधार), फिन अ‍ॅलन, मायकेल ब्रेसवेल, क्रिस्टियन क्लार्क, जेकब डफी, मॅट फिशर, डीन फॉक्सक्रॉफ्ट, लॉकी फर्ग्युसन, मिचेल हे (यष्टिरक्षक), निक केली, टिम सीफर्ट (यष्टिरक्षक), ब्लेअर टिकनर आणि विल यंग.
