आशियाई क्रीडा स्पर्धा २०२६ मध्ये भारतीय तिरंदाजांनी सुवर्णयशाची मोहोर उमटवली. राजेश जाधव आणि चिकिथा तानिपार्थी यांच्या भारतीय मिश्र कंपाउंड तिरंदाजी जोडीने अटीतटीच्या अंतिम सामन्यात दक्षिण कोरियाला शूट-ऑफमध्ये पराभूत करत सुवर्णपदक पटकावले. या विजयासह भारताने लॉस एंजेलिस ऑलिम्पिक २०२८ मधील मिश्र कंपाउंड सांघिक प्रकारासाठी पात्रता कोटाही निश्चित केला. ऑलिम्पिकमध्ये हा प्रकार प्रथमच समाविष्ट करण्यात येणार आहे.
अंतिम सामन्यात भारत आणि दक्षिण कोरिया यांच्यात शेवटपर्यंत चुरस पाहायला मिळाली. दक्षिण कोरियाच्या पार्क जुंगयून आणि चोई योंगही यांच्याविरुद्ध भारतीय जोडीने निर्धारित फेऱ्यांमध्ये १५७-१५७ अशी बरोबरी साधली. त्यामुळे विजेत्याचा निर्णय शूट-ऑफद्वारे घेण्यात आला. या निर्णायक टप्प्यात भारतीय खेळाडूंनी अचूक निशाणा साधत सुवर्णपदकावर नाव कोरले.
अखेरच्या बाणावर भारताची बाजी!
सामन्याच्या सुरुवातीपासूनच भारतीय जोडीने दमदार कामगिरी केली. चिकिथा आणि साहिल यांनी सुरुवातीच्या बाणांवर प्रत्येकी दहा गुण मिळवत भारताला चांगली सुरुवात करून दिली. पहिल्या एंडअखेर भारताने ४०-३९ अशी एका गुणाची आघाडी घेतली. दुसऱ्या एंडमध्येही भारतीय तिरंदाजांनी अचूक निशाणा साधत मध्यंतरापर्यंत आघाडी ८०-७८ अशी वाढवली.
तिसऱ्या एंडमध्ये दक्षिण कोरियाने जोरदार पुनरागमन करण्याचा प्रयत्न केला. भारतीय खेळाडूंच्या काही बाणांमुळे आघाडी कमी झाली, तरी भारताने ११८-११७ अशी एका गुणाची आघाडी कायम ठेवली. अखेरच्या एंडमध्ये कोरियन जोडीने सलग दहा गुणांचे लक्ष्य भेदत भारतावर दबाव निर्माण केला.
निर्णायक क्षणी भारतीय जोडीला सामना बरोबरीत आणण्यासाठी अखेरच्या दोन बाणांत २० गुणांची आवश्यकता होती. चिकिथाने नऊ गुण मिळवल्यानंतर भारतावरील दडपण वाढले. मात्र साहिलने शेवटच्या बाणावर दहा गुण मिळवत सामना १५७-१५७ असा बरोबरीत आणला आणि भारताच्या सुवर्णपदकाच्या आशा कायम ठेवल्या.
शूट-ऑफमध्ये भारतीय तिरंदाजांची कमाल
शूट-ऑफमध्ये चिकिथाने दहा गुण मिळवले, तर दक्षिण कोरियाच्या पार्कनेही दहा गुणांची कमाई केली. त्यानंतर साहिलने पुन्हा अचूक निशाणा साधत दहा गुण मिळवले. कोरियाच्या चोई योंगहीला मात्र नऊ गुणांवर समाधान मानावे लागले. त्यामुळे भारतीय जोडीने निर्णायक लढतीत बाजी मारत सुवर्णपदक जिंकले.
चिकिथाचे दुसरे सुवर्णपदक
या स्पर्धेत चिकिथा तानिपार्थीचे हे दुसरे सुवर्णपदक ठरले. यापूर्वी तिने भारतीय महिला कंपाउंड तिरंदाजी संघासोबत सुवर्णपदक पटकावले होते. तिच्या या कामगिरीमुळे भारतीय तिरंदाजी संघाच्या यशात आणखी भर पडली.
भारताची पदकतालिका
या सुवर्णपदकासह भारताच्या आशियाई क्रीडा स्पर्धा २०२६ मधील पदकांची संख्या ५४ झाली. भारताच्या खात्यात आतापर्यंत ८ सुवर्ण, २१ रौप्य आणि २५ कांस्यपदके जमा झाली आहेत. मिश्र कंपाउंड तिरंदाजीतील सुवर्णपदकासोबतच ऑलिम्पिक पात्रतेचा कोटा मिळाल्याने भारतीय तिरंदाजीसाठी हा विजय महत्त्वपूर्ण ठरला.
