पंतप्रधान नरेंद्र मोदी यांच्या आगामी परदेश दौऱ्याची माहिती भारताच्या परराष्ट्र मंत्रालयाने दिली आहे. मोदी २३-२४ जुलै दरम्यान युनायटेड किंगडम (यूके) च्या दोन दिवसांच्या अधिकृत दौऱ्यावर असतील. त्यानंतर २५-२६ जुलै दरम्यान ते मालदीव दौऱ्यावर जातील. पंतप्रधान मोदींची यूके भेट ही पंतप्रधान कीर स्टारमर यांच्या निमंत्रणावरून होत आहे. ही मोदींची यूकेमधील चौथी भेट आहे. परराष्ट्र सचिव विक्रम मिस्री यांनी सांगितले की, “ही भेट थोडीशी वेळेसाठी असली तरी दोन्ही नेत्यांना द्विपक्षीय संबंधांचा आढावा घेण्याची, त्यात अधिक दृढता आणण्याची आणि प्रादेशिक तसेच जागतिक स्तरावरील मुद्द्यांवर विचारविनिमय करण्याची संधी देईल.”
मिस्री यांनी सांगितले की, २०२१ मध्ये भारत-यूके भागीदारीला व्यापक धोरणात्मक भागीदारीचा दर्जा देण्यात आला होता आणि त्यानंतरपासून दोन्ही देशांमध्ये उच्चस्तरीय राजकीय संपर्क नियमित होत आहेत. ही भागीदारी आणखी बळकट करण्यासाठी दोन्ही देश कटिबद्ध आहेत. ते म्हणाले, “ब्रिटनमधील अनेक विद्यापीठे भारतात आपले कॅम्पस सुरू करण्याचा विचार करत आहेत. २०२३-२४ मध्ये द्विपक्षीय व्यापार $५५ अब्ज पार गेला आहे. यूके भारतात सहावा सर्वात मोठा गुंतवणूकदार आहे आणि त्याचा एकूण गुंतवणूक निधी $३६ अब्ज इतका आहे.”
हेही वाचा..
मुख्यमंत्री देवेंद्र फडणवीसांच्या वाढदिवसानिमित्त कांदिवली पूर्व येथे रक्तदान शिबीर
व्हेंचर कॅपिटल गुंतवणूक ३.५ अब्ज डॉलर्सपर्यंत
८० टनाचं शिखर, पायाभरणीशिवाय हजार वर्षांहून अधिक जुने शिवमंदिर
वायुदलातून निवृत्त होणार मिग-२१ फायटर जेट
खलिस्तानी अतिरेकी आणि त्यांच्याशी संबंधित संस्थांची उपस्थिती हा विषय भारतकडून सतत यूके प्रशासनाच्या निदर्शनास आणला जातो, असे विक्रम मिस्री म्हणाले. “हा विषय केवळ भारतासाठी नव्हे, तर यूकेसारख्या देशांसाठीही चिंतेचा आहे, कारण हा त्यांच्या देशातील सामाजिक सलोखा आणि सार्वजनिक सुव्यवस्थेलाही बाधा पोहोचवू शकतो. लष्कर-ए-तैयबाशी संबंधित दहशतवादी संघटना टीआरएफ (TRF) यावर प्रतिक्रिया देताना, त्यांनी सांगितले की, “अमेरिकेच्या परराष्ट्र मंत्रालयाने अलीकडेच टीआरएफला परकीय दहशतवादी संघटना घोषित केले आहे. ही माहिती ब्रिटिश प्रशासनालाही माहीत आहे, त्यामुळे सीमा पार दहशतवादावर ठोस प्रतिसाद देण्यावर भर देण्याची ही संधी असेल.”
पंतप्रधान मोदी २५-२६ जुलै दरम्यान मालदीव दौऱ्यावर जातील. ही भेट मालदीवचे अध्यक्ष मोहम्मद मुइज्जू यांच्या निमंत्रणावरून होणार आहे. दौऱ्यात द्विपक्षीय बैठकांसह काही पायाभूत सुविधा प्रकल्पांचे उद्घाटन होणार असून काही नव्या उपक्रमांचीही घोषणा होणार आहे. मालदीव हा भारताच्या ‘पडोसी प्रथम’ धोरणाचा आणि ‘सागर (SAGAR)’ दृष्टीकोनाचा एक महत्त्वाचा भाग आहे. नैसर्गिक किंवा मानवनिर्मित आपत्तीच्या वेळी भारताने मालदीवला तत्काळ मदत केली आहे. राजकीय पातळीवर नियमित उच्चस्तरीय भेटीमुळे संबंध अधिक दृढ झाले आहेत. आर्थिक संबंधांबाबत त्यांनी सांगितले की, भारत मालदीवचा सर्वात मोठा व्यापार भागीदार आहे. द्विपक्षीय व्यापार सुमारे $५०० मिलियनचा आहे. भारतीय गुंतवणूकदार पर्यटन आणि अन्य क्षेत्रांमध्ये सक्रिय आहेत. तसेच मुक्त व्यापार करार व गुंतवणूक संधि यावरही दोन्ही देशांमध्ये चर्चा सुरू आहे.
