जागतिक आर्थिक अस्थिरता, अमेरिके-इराण तणाव आणि डॉलरच्या वाढत्या मजबुतीचा परिणाम आता थेट सोन्या-चांदीच्या बाजारावर दिसू लागला आहे. गेल्या काही दिवसांत विक्रमी उंची गाठणाऱ्या सोन्याच्या दरांनी आता अचानक घसरण घेतल्याने गुंतवणूकदारांसह सर्वसामान्य ग्राहकांचेही लक्ष सराफा बाजाराकडे लागले आहे. गुरुवारी देशातील प्रमुख शहरांमध्ये सोन्याच्या किमतींमध्ये मोठी घसरण नोंदवली गेली, तर चांदीच्या दरातही मोठी अस्थिरता पाहायला मिळाली.
२४ कॅरेट सोन्याचा दर प्रति १० ग्रॅम सुमारे १ लाख ५८ हजार रुपयांच्या आसपास पोहोचला असून २२ कॅरेट सोन्याचे भाव १ लाख ४५ हजार रुपयांच्या जवळ आले आहेत. काही दिवसांपूर्वीच सोन्याने ऐतिहासिक उच्चांक गाठला होता, मात्र आंतरराष्ट्रीय बाजारातील बदलत्या परिस्थितीमुळे आता दर घसरताना दिसत आहेत. दिल्ली, मुंबई, चेन्नई आणि कोलकाता यांसारख्या मोठ्या शहरांमध्ये सोन्याच्या किमतींमध्ये लक्षणीय घट झाली आहे. दिल्लीमध्ये ९९.९ टक्के शुद्धतेचे सोने तब्बल २ हजार ८०० रुपयांनी घसरल्याने ग्राहकांना काहीसा दिलासा मिळाला आहे.
हे ही वाचा:
बंदर अब्बास हल्ल्यानंतर अमेरिकन तळांवर इराणचे प्रत्युत्तर
मुख्यमंत्री फडणवीसांनी घेतली पंतप्रधान मोदींची भेट
‘पर्शियन गल्फ स्ट्रेट अथॉरिटी’ला ब्लॅकलिस्टमध्ये टाकले
रशियाची सोन्याची विक्री वाढली
आंतरराष्ट्रीय बाजारात अमेरिकन डॉलर मजबूत झाल्यामुळे गुंतवणूकदारांनी सुरक्षित गुंतवणूक म्हणून डॉलरकडे मोर्चा वळवला आहे. त्याचा थेट दबाव सोन्यावर आला असून जागतिक बाजारात सोन्याच्या किंमती दोन महिन्यांच्या नीचांकी पातळीवर गेल्या आहेत. अमेरिकन फेडरल रिझर्व्हकडून व्याजदर कपातीबाबत अद्याप स्पष्ट संकेत मिळत नसल्याने मौल्यवान धातूंमध्ये अस्थिरता कायम आहे. त्यातच मध्यपूर्वेतील तणावामुळे जागतिक आर्थिक वातावरण आणखी अनिश्चित बनले आहे.
एमसीएक्स बाजारातही सोन्या-चांदीच्या दरांमध्ये मोठे चढ-उतार दिसून आले. एमसीएक्स गोल्ड सुमारे १ लाख ५५ हजार रुपये प्रति १० ग्रॅमवर व्यवहार करत होते, तर चांदीचे दर प्रति किलो २ लाख ६६ हजार रुपयांच्या आसपास पोहोचले. चांदीमध्ये किंचित वाढ झाली असली तरी बाजारातील अस्थिरतेमुळे गुंतवणूकदार सावध भूमिका घेताना दिसत आहेत.
दरम्यान, सोन्याच्या घसरलेल्या किमती ग्राहकांसाठी मोठी संधी मानली जात आहे. लग्नसराई आणि आगामी सणासुदीच्या पार्श्वभूमीवर अनेकांनी सोने खरेदीसाठी सराफा दुकानांकडे गर्दी केली आहे. व्यापाऱ्यांच्या मते, दर कमी झाल्यामुळे दागिन्यांच्या विक्रीत वाढ होण्याची शक्यता आहे. मात्र तज्ज्ञांनी सध्या बाजारात मोठी अस्थिरता असल्याने गुंतवणूक करताना संयम आणि सावधगिरी बाळगण्याचा सल्ला दिला आहे.
आगामी काळात अमेरिकेतील महागाईचे आकडे, फेडरल रिझर्व्हचे व्याजदर निर्णय आणि जागतिक राजकीय परिस्थिती यावर सोन्या-चांदीच्या दरांची पुढील दिशा ठरणार आहे. त्यामुळे सराफा बाजारातील प्रत्येक हालचालीकडे आता गुंतवणूकदार आणि ग्राहकांचे बारकाईने लक्ष लागले आहे.
