भारतीय एफएमसीजी बाजारपेठेत आपले स्थान अधिक मजबूत करण्याच्या उद्देशाने रिलायन्स इंडस्ट्रीज आता बिस्किट व्यवसायात उतरण्याच्या तयारीत आहे. मुकेश अंबानी यांच्या रिलायन्स समूहाच्या ‘इंडिपेंडन्स’ या ब्रँडअंतर्गत बिस्किट उत्पादने बाजारात आणली जात आहेत. त्यामुळे देशातील बिस्किट बाजारपेठेत आधीपासून वर्चस्व असलेल्या पारले, ब्रिटानिया आणि आयटीसी या कंपन्यांसमोर मोठे आव्हान निर्माण होण्याची शक्यता आहे. रिलायन्सने यापूर्वी कॅम्पा या शीतपेय ब्रँडच्या माध्यमातून शीतपेय बाजारात स्पर्धा निर्माण केली होती. आता त्याच रणनीतीने बिस्किट बाजारपेठेतही आपले स्थान निर्माण करण्याचा कंपनीचा प्रयत्न आहे.
रिलायन्सने आपल्या बिस्किट पोर्टफोलिओमध्ये ग्लुकोज, मेरी, बटर, मिल्की, कोको आणि क्रीम अशा नऊ प्रकारांतील एकूण २८ उत्पादने सादर केली आहेत. या उत्पादनांच्या किमती पाच रुपयांपासून सुरू होतात, तर मोठ्या पॅकची किंमत ४० ते १२५ रुपयांपर्यंत आहे. सुरुवातीला तामिळनाडूच्या बाजारपेठेत या उत्पादनांचा विस्तार करण्यात आला असून, आगामी काळात देशभरात विक्री वाढवण्याची कंपनीची योजना आहे. कमी किमतीतील पॅकच्या माध्यमातून सर्वसामान्य ग्राहकांना आकर्षित करणे, हा या रणनीतीचा महत्त्वाचा भाग आहे. याशिवाय श्रीलंकेच्या मालिबन या बिस्किट उत्पादक कंपनीसोबतही रिलायन्सने धोरणात्मक भागीदारी केली आहे.
हे ही वाचा:
पुणे मेट्रोमुळे शहराच्या अर्थकारणाला नवी गती
अयोध्येवर आता कोणत्याही ‘मंथरा’, ‘मारीच’ची वाकडी नजर पडू देणार नाही
रामायण: पार्ट वन’ची तिसऱ्या दिवशी ६९.८० कोटींची कमाई
चीनचा धोका म्हणूनच सियांग धरणाचे धोरण
भारतीय बिस्किट बाजारपेठेचा आकार रिलायन्ससाठी मोठी संधी निर्माण करणारा आहे. मोतीलाल ओसवाल फायनान्शियल सर्व्हिसेसच्या जानेवारी २०२६ मधील अहवालानुसार, आर्थिक वर्ष २०२४ मध्ये भारतीय बिस्किट बाजारपेठेचे मूल्य सुमारे ५५ हजार १०० कोटी रुपये होते. २०२९ पर्यंत हा बाजार ९० हजार ३०० कोटी रुपयांवर पोहोचण्याचा अंदाज आहे. आर्थिक वर्ष २०२५ च्या अंदाजानुसार ब्रिटानियाचा बाजारहिस्सा सुमारे ३२ टक्के, पारलेचा २९ टक्के, तर आयटीसीचा ११ टक्के आहे. त्यामुळे या प्रस्थापित कंपन्यांच्या बाजारपेठेत प्रवेश करणे रिलायन्ससाठी आव्हानात्मक ठरणार आहे.
दरम्यान, ब्रिटानियाचे व्यवस्थापकीय संचालक रक्षित हरगावे यांनीही रिलायन्सच्या प्रवेशाबाबत प्रतिक्रिया दिली आहे. केवळ कमी किमतीच्या आधारावर बिस्किट बाजारपेठेत मोठा बदल घडवणे कठीण असल्याचे त्यांनी स्पष्ट केले. कारण या क्षेत्रात पाच आणि दहा रुपयांच्या किमतीतील उत्पादने आधीपासून उपलब्ध आहेत. रिलायन्सकडे देशभरातील रिटेल स्टोअर्स आणि जिओमार्टचे मजबूत नेटवर्क असले, तरी पारले आणि ब्रिटानियाची वितरण व्यवस्था तसेच ग्राहकांचा विश्वास ही मोठी ताकद आहे. त्यामुळे आगामी काळात बिस्किट बाजारातील स्पर्धा अधिक तीव्र होण्याची शक्यता असून, रिलायन्सची ही नवी खेळी ग्राहकांसाठी अधिक पर्याय आणि कंपन्यांसाठी मोठे आव्हान घेऊन येणार आहे.
