कोल्हापूर शहरातील सुर्वे नगर परिसरात एका बंद घरात झालेल्या भीषण स्फोटाने संपूर्ण परिसर हादरून गेला आहे. या स्फोटात उच्च क्षमतेच्या स्फोटक साहित्याचा, विशेषतः जिलेटिनच्या काड्यांचा वापर झाल्याचा प्राथमिक संशय पोलिसांनी व्यक्त केला आहे. ही घटना अपघाती नसून नियोजनपूर्वक घडवून आणल्याची शक्यता तपास यंत्रणा तपासत आहे. स्फोटाची तीव्रता इतकी प्रचंड होती की घराच्या भिंतींना मोठे तडे गेले, काही भाग कोसळला आणि उडालेल्या ठिकऱ्यांमुळे शेजारील घरांचेही नुकसान झाले. अचानक झालेल्या स्फोटामुळे परिसरातील नागरिक घाबरून घराबाहेर धावले आणि काही काळ भीतीचे वातावरण निर्माण झाले. सुदैवाने संबंधित घर बंद असल्याने त्या वेळी घरात कोणीही नसल्यामुळे जीवितहानी टळली.
घटनेची माहिती मिळताच पोलिस, बॉम्ब शोधक आणि नाशक पथक, तसेच फॉरेन्सिक तज्ज्ञ घटनास्थळी दाखल झाले. संपूर्ण परिसराची नाकेबंदी करून पुरावे गोळा करण्यात आले असून, स्फोटासाठी नेमके कोणते स्फोटक वापरण्यात आले, ते घरात कसे आणण्यात आले आणि त्यामागचा उद्देश काय होता, याचा तपास सुरू आहे. प्राथमिक तपासात जिलेटिनच्या काड्यांचा वापर झाल्याची शक्यता अधिक बळावली असून, फॉरेन्सिक तपासानंतरच याबाबत अंतिम निष्कर्ष समोर येणार आहे.
हे ही वाचा:
विरोधकांना ऐकवेल मोटाभाईचा जवाब?
शिक्षणाचे प्रश्न सोडून आता कॉक्रोच पार्टी E20 प्रश्नाकडे
‘माफी मागणार नाही’; सावजी वादावर तुकाराम मुंढे ठाम
अनधिकृत स्पर्धांवर पीसीबीचा चाप
कोल्हापूरचे पोलिस अधीक्षक नीलोत्पल यांनी सांगितले की, हा स्फोट अपघाती वाटत नसून घराचे नुकसान करण्याच्या उद्देशाने घडवून आणला असावा, अशी शक्यता नाकारता येत नाही. या घटनेमागे वैयक्तिक वैर, मालमत्तेचा वाद किंवा इतर कोणता गुन्हेगारी हेतू आहे का, याचाही तपास सर्व बाजूंनी सुरू आहे. परिसरातील सीसीटीव्ही फुटेज, तांत्रिक पुरावे आणि स्थानिक नागरिकांचे जबाब यांचीही छाननी करण्यात येत आहे.
या धक्कादायक घटनेमुळे कोल्हापूरमध्ये खळबळ उडाली असून, नागरिकांनी अफवांवर विश्वास न ठेवता पोलिसांना सहकार्य करण्याचे आवाहन प्रशासनाने केले आहे. फॉरेन्सिक अहवाल आणि तपासातून मिळणाऱ्या पुराव्यांच्या आधारे या स्फोटामागील नेमके कारण आणि जबाबदार व्यक्तींचा लवकरच पर्दाफाश होईल, असा विश्वास पोलिसांनी व्यक्त केला आहे.
