आशियाई क्रीडा स्पर्धा २०२६ मध्ये भारतीय तिरंदाजांनी दमदार कामगिरी करत सुवर्णपदकांची हॅट्ट्रिक नोंदवली आहे. पुरुषांच्या कंपाउंड सांघिक अंतिम सामन्यात गणेश, साहिल आणि कुशल या भारतीय त्रिकुटाने चीनच्या संघाचा २३८-२३७ असा अवघ्या एका गुणाने पराभव करत सुवर्णपदकावर नाव कोरले. या सामन्यात एका क्षणी भारत पिछाडीवर होता; मात्र निर्णायक टप्प्यात भारतीय तिरंदाजांनी अचूक निशाणा साधत सामन्याचे चित्रच पालटले.
अंतिम सामन्याच्या पहिल्या तीन एंडपर्यंत चीनच्या संघाचे पारडे जड होते. भारतीय संघावर दबाव निर्माण झाला होता. मात्र, गणेश, साहिल आणि कुशल यांनी संयम न गमावता चौथ्या एंडमध्ये जोरदार पुनरागमन केले. निर्णायक क्षणी प्रत्येक बाण अचूक लक्ष्यावर साधत भारताने चीनवर आघाडी घेतली आणि अखेर २३८-२३७ असा विजय मिळवला. त्यामुळे अत्यंत चुरशीच्या लढतीत भारताच्या नावावर आणखी एका सुवर्णपदकाची भर पडली.
हे ही वाचा:
एंटीलिया प्रकरण झाकण्याचे प्रयत्न होत आहेत का?
ठाण्यात बाळू पूर्णेकर हत्येप्रकरणी सहकारी पप्या शिंदे अटकेत
या विजयासह आशियाई क्रीडा स्पर्धेत तिरंदाजीमध्ये भारताने तिसरे सुवर्णपदक जिंकले आहे. याआधी भारताने महिला कंपाउंड सांघिक आणि मिश्र कंपाउंड सांघिक प्रकारात सुवर्णपदक पटकावले होते. पुरुष संघाच्या या विजयामुळे तिरंदाजीत भारताची सुवर्णहॅट्ट्रिक पूर्ण झाली. विशेष म्हणजे साहिल जाधवचे हे स्पर्धेतील दुसरे सुवर्णपदक ठरले आहे. याआधी त्याने चिकिता यांच्यासोबत मिश्र कंपाउंड सांघिक प्रकारात सुवर्णपदक मिळवले होते.
पुरुष कंपाउंड संघाच्या या सुवर्णकामगिरीमुळे आशियाई क्रीडा स्पर्धेतील भारताच्या एकूण सुवर्णपदकांची संख्या १० वर पोहोचली आहे. तिरंदाजी आणि नेमबाजीमध्ये भारताने प्रत्येकी तीन सुवर्णपदके मिळवली असून, पुढील सामन्यांमध्ये तिरंदाजांकडून आणखी पदकांची अपेक्षा आहे. चीनविरुद्ध एका गुणाच्या फरकाने मिळवलेला हा विजय भारतीय तिरंदाजी संघाच्या दबावाच्या परिस्थितीतही अचूकता आणि संयम कायम ठेवण्याच्या क्षमतेचे दर्शन घडवणारा ठरला आहे.
