बांगलादेशात पुन्हा एकदा हिंसाचार उफाळून आला आहे. फरिदपूरमध्ये काही अज्ञात उपद्रवींनी उभ्या बसला आग लावली. या आगीत बसमध्ये झोपलेल्या ६० वर्षीय चालकाचा होरपळून मृत्यू झाला. दरम्यान, राजधानी ढाक्यासह बांगलादेशातील अनेक जिल्ह्यांमध्ये जाळपोळ आणि बॉम्बस्फोटांच्या घटना घडल्या आहेत. माहितीनुसार, मृत चालकाचे नाव मोहम्मद कालाचन शेख असे आहे.
ढाका, सावर आणि गाझीपूरमध्येही अनेक बस पेटवण्यात आल्या. देशभरात सुरू असलेल्या जाळपोळ आणि बॉम्बस्फोटांच्या घटनांच्या मालिकेचाच हा भाग असल्याचे सांगितले जात आहे. फरिदपूरमधील गोलचामट नव्या बसस्थानकाजवळ चालक मोहम्मद कालाचन बसमध्ये झोपले होते. त्याचवेळी अज्ञात व्यक्तींनी बसला आग लावली. अग्निशमन दलाच्या जवानांनी त्यांना बसमधून बाहेर काढून फरिदपूर मेडिकल कॉलेज रुग्णालयात दाखल केले. मात्र, डॉक्टरांनी त्यांना मृत घोषित केले.
दरम्यान, बांगलादेशातील झेनैदाह येथे सोमवारी रात्री आणखी एक घटना घडली. इस्लामिक विद्यापीठाच्या सुमारे ३५ विद्यार्थ्यांना घेऊन जाणाऱ्या डबल डेकर बसवर पेट्रोल बॉम्ब फेकण्यात आला. ‘दिगंता’ नावाची ही बस विद्यापीठाच्या परिसराकडे जात असताना शैलकुपा उपजिल्ह्यातील ड्रॅगन बागान परिसरात हा हल्ला झाला.
हे ही वाचा:
मंदिर परिसरात मांसाचे अवशेष टाकण्यावरून वाद; पुजाऱ्यासह ग्रामस्थांना मारहाण
काळबादेवीत भररस्त्यावर रॉकेट फोडणाऱ्या तरुणावर गुन्हा
यमुनेत आता जलसफर; ‘नमो यमुना रिव्हर सफारी’ आजपासून सुरू
ट्रम्प म्हणतात संघर्ष संपला; इराण म्हणतो शरण या!
ढाक्यातील मोहम्मदपूर परिसरातही सोमवारी रात्री सुमारे ९.१५ वाजता टोकियो स्क्वेअरसमोर दोन बॉम्बस्फोट झाले. या घटनांमागे कोणाचा हात आहे, याची अद्याप ओळख पटलेली नसल्याचे पोलिसांनी सांगितले. वृत्तानुसार, सोमवारी सावर, ढाका आणि गाझीपूर येथे एकूण सहा बस पेटवण्यात आल्या. सावरमध्ये ढाका-अरिचा महामार्गालगत उभ्या असलेल्या दोन बसना रात्री १ वाजता आणि पहाटे ४ वाजता आग लावण्यात आली. गेंडा आणि बालियापूर परिसरात या घटना घडल्या. गाझीपूरमधील कालियाकैर उपजिल्ह्यात ढाका-टांगाइल महामार्गाजवळील चंद्रा परिसरात उभ्या असलेल्या आणखी दोन बस पेटवण्यात आल्या.
