विलेपार्ले पूर्व येथील स्टेशन रोड परिसरात बुधवारी सायंकाळी झालेल्या भीषण अपघातात एका ४१ वर्षीय महिलेचा मृत्यू झाला, तर दोघे जण गंभीर जखमी झाले आहेत. निष्काळजीपणे कार चालवणाऱ्या चालकाने उभ्या असलेल्या दुचाकींना मागून धडक दिल्याने हा दुर्दैवी प्रकार घडला.
मिळालेल्या माहितीनुसार, बुधवारी सायंकाळी ४:३० ते ५:०० च्या सुमारास वि. स. खांडेकर रोड परिसरात हा अपघात घडला. आरोपी चालक विलास श्रीधर गव्हाणकर (वय ४४) हा आपली इलेक्ट्रिक कार (क्रमांक एमएच ०१ डीएक्स ९१२५) चालवत होता. या दरम्यान, त्याने गाडीवरचा ताबा गमावला आणि मोगीबाई मार्केट, रेल्वे स्थानक रोड येथे उभे असलेल्या तीन वाहनचालकांना मागून जोरदार धडक दिली.
हे ही वाचा:
ई-रिक्शा आणि ट्रॅक्टरच्या भीषण धडकेत सहा महिलांचा मृत्यू
होर्मुझ खुला, तेलवाहतूक पुन्हा सुरू
ट्रम्पसमोर मोदींचा नाविक सुरक्षेवर ठाम आवाज
या अपघातात किंजल हिरेन शहा (वय ४१) या महिलेचा दुर्दैवी मृत्यू झाला. तसेच, या अपघातात निर्मला डोजिया आणि प्रेमजी डोजिया हे दोघे गंभीर जखमी झाले आहेत. जखमींना तातडीने उपचारांसाठी नजीकच्या गावडे हॉस्पिटलमध्ये दाखल करण्यात आले असून, त्यांच्यावर उपचार सुरू आहेत.
याप्रकरणी निष्काळजीपणे आणि बेदरकारपणे वाहन चालवून अपघातास कारणीभूत ठरल्याप्रकरणी संबंधित कार चालकावर कायदेशीर कारवाईची प्रक्रिया सुरू आहे.
