अमेरिकेचे राष्ट्राध्यक्ष डोनाल्ड ट्रम्प यांच्या हत्येसाठी ‘इस्लामिक रेझिस्टन्स इन इराक’ या इराणसमर्थित सशस्त्र गटाने १ कोटी अमेरिकी डॉलर (सुमारे ८६ कोटी रुपये) इतक्या बक्षिसाची घोषणा केल्याचा दावा समोर आला आहे. अमेरिका आणि इराण यांच्यात सुरू असलेल्या वाढत्या संघर्षाच्या पार्श्वभूमीवर ही धमकी देण्यात आल्याने मध्य पूर्वेतील तणाव आणखी वाढण्याची शक्यता व्यक्त केली जात आहे.
गटाशी संबंधित माध्यमांवर प्रसिद्ध करण्यात आलेल्या निवेदनात, “जो कोणी गुन्हेगार डोनाल्ड ट्रम्प यांना ठार करेल किंवा त्यांच्या हत्येत थेट भूमिका बजावेल, त्याला १ कोटी डॉलरचे बक्षीस दिले जाईल,” असे म्हटले आहे. या निवेदनात ट्रम्प यांच्यावर इराणविरोधी कारवाया, लष्करी हल्ले आणि प्रदेशातील संघर्ष तीव्र केल्याचा आरोप करण्यात आला आहे.
‘इस्लामिक रेझिस्टन्स इन इराक’ हा इराणसमर्थित विविध शिया सशस्त्र गटांचा समावेश असलेला संघ असल्याचे मानले जाते. या संघटनेने यापूर्वी इराक आणि सीरियातील अमेरिकन लष्करी तळांवर ड्रोन आणि क्षेपणास्त्र हल्ल्यांची जबाबदारी स्वीकारली आहे. अलीकडे अमेरिकेने इराणमधील अनेक लष्करी ठिकाणांवर हवाई हल्ले केल्यानंतर या संघटनेकडून अमेरिकेविरोधातील भूमिका अधिक आक्रमक झाली आहे.
🚨 Islamic Resistance in Iraq announces $10 million bounty for killing Trump, funded by donations from supporters, available for individuals, groups, or entities carrying out or directing the act pic.twitter.com/Rv9QSvCNnG
— Middle East Conflict Tracker (@MEC_Tracker) July 16, 2026
ही धमकी अशा वेळी समोर आली आहे, जेव्हा अमेरिका आणि इराण यांच्यातील संघर्ष सलग अनेक दिवसांपासून सुरू आहे. अमेरिकेने इराणमधील लष्करी आणि धोरणात्मक लक्ष्यांवर हवाई हल्ले केले असून त्याला प्रत्युत्तर म्हणून इराणसमर्थित गटांकडून अमेरिकन हितसंबंधांवर हल्ल्यांच्या धमक्या दिल्या जात आहेत. या पार्श्वभूमीवर ट्रम्प यांच्या हत्येसाठी बक्षीस जाहीर करण्याची घोषणा अत्यंत गंभीर मानली जात आहे.
हे ही वाचा:
ग्रूमिंग गँगच्या दोषीला स्वीकारण्यास नकार, तरी पाकवर कोट्यवधींची मेहरबानी
‘विक्रम-1’ झेपावले; भारताच्या खासगी अंतराळ क्षेत्राचे नवे पर्व
लॉर्ड्समधील सामना रोहितचा अखेरचा नाही!
वांगचुक यांना हटवल्यानंतर अभिजीत दिपके आमरण उपोषणावर
अमेरिकन प्रशासनाने या दाव्यावर अधिकृत प्रतिक्रिया दिलेली नाही. मात्र, ट्रम्प यांच्या सुरक्षेत वाढ करण्यात आल्याचे अमेरिकन माध्यमांनी म्हटले आहे. अमेरिकेच्या गुप्तचर आणि सुरक्षा यंत्रणांनी या धमकीचे गांभीर्याने मूल्यांकन सुरू केल्याचे वृत्त आहे. दरम्यान, या घोषणेची स्वतंत्रपणे पडताळणी झालेली नाही. बक्षीस जाहीर केल्याचा दावा इराणसमर्थित माध्यमांमधून आणि संबंधित गटाच्या निवेदनांवर आधारित असून, या घोषणेची अधिकृत पुष्टी इराक सरकार किंवा इतर स्वतंत्र आंतरराष्ट्रीय संस्थांकडून अद्याप झालेली नाही.
