घरदेश दुनिया“भारत-पाक युद्ध अणुयुद्धाच्या उंबरठ्यावर होते” ट्रम्प यांचा पुन्हा युद्ध थांबवल्याचा दावा

“भारत-पाक युद्ध अणुयुद्धाच्या उंबरठ्यावर होते” ट्रम्प यांचा पुन्हा युद्ध थांबवल्याचा दावा

भारताने आधीच फेटाळला आहे अमेरिकेच्या मध्यस्थीचा दावा

अमेरिकेचे राष्ट्राध्यक्ष डोनाल्ड ट्रम्प यांनी पुन्हा एकदा भारत-पाकिस्तान संघर्षाबाबत मोठा दावा करत, दोन्ही देशांमधील युद्ध अणुयुद्धात परिवर्तित होण्याच्या उंबरठ्यावर पोहोचले होते आणि आपण हस्तक्षेप करून ते थांबवले, असे म्हटले. ब्रिटनमधील आरएएफ माइल्डेनहॉल येथे पत्रकारांशी संवाद साधताना ट्रम्प यांनी हा दावा केला. मात्र भारताने यापूर्वी अनेकदा अशा दाव्यांचे खंडन करत युद्धविराम हा भारत आणि पाकिस्तान यांच्यातील थेट लष्करी चर्चेचा परिणाम असल्याचे स्पष्ट केले आहे.

ट्रम्प म्हणाले, “भारत आणि पाकिस्तानमध्ये भीषण युद्ध सुरू होते. ते जवळपास आठवडाभर चालले होते. त्या संघर्षात ११ विमाने पाडली गेली होती आणि परिस्थिती अणुयुद्धापर्यंत जाऊ शकली असती.” त्यांनी दावा केला की, दोन्ही देशांसोबत व्यापार करारांचा मुद्दा उपस्थित करून त्यांनी संघर्ष थांबवण्यासाठी दबाव आणला.

ट्रम्प यांनी पाकिस्तानचे पंतप्रधान शहबाज शरीफ यांनी आपले आभार मानल्याचाही पुनरुच्चार केला. “तुम्ही लाखो लोकांचे प्राण वाचवले,” असे शरीफ यांनी सांगितल्याचा दावा ट्रम्प यांनी केला. तसेच आपल्या कार्यकाळात आपण जगभरातील आठ मोठे संघर्ष थांबवण्यात भूमिका बजावल्याचेही त्यांनी म्हटले. ट्रम्प यांनी यापूर्वीही अनेक वेळा भारत-पाकिस्तान संघर्षात अमेरिकेने मध्यस्थी केल्याचा दावा केला आहे. मात्र भारत सरकारने हा दावा सातत्याने फेटाळला आहे. भारताच्या परराष्ट्र मंत्रालयाने स्पष्ट केले आहे की, युद्धविरामाचा निर्णय दोन्ही देशांच्या लष्करांच्या महासंचालकांमधील (DGMO) थेट चर्चेनंतर घेण्यात आला होता. या प्रक्रियेत कोणत्याही तृतीय पक्षाची मध्यस्थी नव्हती.

हे ही वाचा:

इराण युद्धावरून नाटोत फूट? स्पेनसोबत व्यापार संबंध तोडण्याची धमकी

शांतता करार संपल्याच्या घोषणेनंतर अमेरिकेचे इराणवर पुन्हा हल्ले

कनेक्टिंग लिंकबाबतचा सगळा खोटारडेपणा समोर आला!

शिवसेनेचे मुजोर नगरसेवक रमेश म्हात्रेंना अटक, डॉक्टर, नर्सेसना केली मारहाण

ट्रम्प यांनी यापूर्वीही भारत आणि पाकिस्तानला व्यापार करारांवर परिणाम होईल, असा इशारा देऊन संघर्ष थांबवण्यास भाग पाडल्याचा दावा केला होता. त्यांच्या मते, अण्वस्त्रधारी दोन देशांमधील युद्ध जगासाठी अत्यंत धोकादायक ठरले असते आणि त्यामुळे तातडीने हस्तक्षेप करणे आवश्यक होते.

ट्रम्प यांच्या या नव्या वक्तव्यानंतर भारत-पाकिस्तान संघर्षातील अमेरिकेच्या कथित भूमिकेवर पुन्हा चर्चा सुरू झाली आहे. मात्र भारताने आधीप्रमाणेच आपली भूमिका कायम ठेवत कोणत्याही विदेशी मध्यस्थीचा दावा मान्य केलेला नाही. त्यामुळे ट्रम्प यांच्या विधानांवर पुन्हा एकदा प्रश्नचिन्ह उपस्थित झाले आहे.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा

The reCAPTCHA verification period has expired. Please reload the page.

Exit mobile version