भारत आणि इस्रायलसमोर ‘कट्टर इस्लामी दबहशतवादी हल्ल्यांची नवी लाट’ येण्याची शक्यता असल्याचा इशारा भारतातील इस्रायलचे राजदूत रुवेन अझर यांनी दिला आहे. दहशतवादी संघटना सरकारे आणि सुरक्षा यंत्रणांपेक्षा अधिक वेगाने आपली क्षमता विकसित करत असल्याचा दावा त्यांनी केला.
फ्लायदुबई विमान हायजॅक करण्याच्या प्रयत्नाच्या पार्श्वभूमीवर इंडिया टुडेला दिलेल्या विशेष मुलाखतीत अझर यांनी आपला मुद्दा स्पष्ट करण्यासाठी हमासचा दाखला दिला. भारताच्या शेजारील भागातील दहशतवादी संघटनांना हमासकडून प्रेरणा मिळत असल्याचे त्यांनी म्हटले.
अझर यांनी जोर देत सांगितले, “दहशतवादी आपल्यापेक्षा अधिक वेगाने पुढे जात आहेत आणि आपल्याला त्यांच्यापेक्षा अधिक वेगाने पुढे जावे लागेल. आपण अत्यंत दक्ष राहिले पाहिजे. पुढील (इस्लामी दहशतवादी हल्ल्यांच्या) लाटेच्या आधी राहायचे असेल, तर आपल्याला वेगाने कार्य करावे लागेल. आणि अशी पुढील लाट येणार आहे.”
इस्रायली राजदूतांनी हे वक्तव्य अशा वेळी केले आहे, जेव्हा तेल अवीवमध्ये 7 ऑक्टोबर 2023 रोजी झालेल्या हल्ल्याला तीन वर्षे पूर्ण झाली आहेत. या हल्ल्यानंतर गाझामध्ये विनाशकारी युद्धाला सुरुवात झाली.
हे ही वाचा:
बकऱ्यांना विरोध केल्यामुळे मिरारोडच्या त्या सोसायटीत नवरात्रोत्सवाला मनाई
पेनल्टीवर अखेरची मोहोर; मेस्सीचा भावुक अलविदा!
भारतीय अर्थव्यवस्थेला आरबीआयचा मोठा बूस्टर
दहशतवादी संघटना परस्परांमध्ये अधिकाधिक सहकार्य करत आहेत का, असे विचारण्यात आले असता अझर यांनी मध्यपूर्वेबाहेर हमासच्या अलीकडील हालचालींकडे लक्ष वेधले. गेल्या वर्षभरात हमासचे अनेक वरिष्ठ कमांडर पाकिस्तान आणि बांगलादेशात दिसून आल्याचे त्यांनी सांगितले.
नाजी जहीर आणि खालिद अल-कदुमी यांसारखे हमासचे नेते जैश-ए-मोहम्मद आणि लष्कर-ए-तैयबा या दहशतवादी संघटनांनी आयोजित केलेल्या कार्यक्रमांमध्ये सहभागी होताना दिसल्याचेही सांगण्यात आले आहे.
इंडिया टुडेला मिळालेल्या अलीकडील गुप्तचर माहितीनुसार, लष्कर-ए-तैयबाच्या कार्यकर्त्यांना हमासच्या कार्यपद्धती आणि ऑपरेशनल पद्धतींचे प्रशिक्षण दिले जात असल्याचे समोर आले आहे.
अझर यांनी २०२५ मधील पहलगाम दहशतवादी हल्ल्याचे उदाहरण देत तो हमासच्या प्रभावाचे एक “प्रकटीकरण” असल्याचे म्हटले. पहलगाम हल्ल्यानंतर भारताने ऑपरेशन सिंदूर सुरू केले होते. या हल्ल्यात २५ पर्यटकांचा मृत्यू झाला होता.
अझर म्हणाले, “हमासने या भागातील दहशतवादी संघटनांना प्रेरणा दिली आहे आणि पहलगाम हल्ला त्याचे एक प्रकटीकरण होते. आम्ही हमासच्या प्रतिनिधींना येथे येऊन बैठका घेताना पाहिले आहे. मात्र, पडद्यामागे नेमके काय सुरू आहे, हे आम्हाला माहीत नाही.”
हा सध्याच्या “वास्तवाचा” एक भाग असल्याचे सांगत इस्रायली राजदूतांनी लोकशाही देशांनी या धोक्याचा सामना करण्यासाठी आणि तो “पराभूत करण्यासाठी” आवश्यक क्षमता विकसित करण्याचे आवाहन केले.
फ्लायदुबई विमानातील हायजॅकच्या प्रयत्नाच्या पार्श्वभूमीवर इशारा
इस्रायली राजदूतांचा हा इशारा अशा वेळी आला आहे, जेव्हा फ्लायदुबई विमानातील थरारक घटनेचा तपास सुरू आहे. या प्रकरणात ओमानच्या एका सहवैमानिकाने विमानाच्या कॅप्टनची हत्या करण्याचा, विमानाचे नियंत्रण ताब्यात घेण्याचा आणि ते तेल अवीवमध्ये कोसळवण्याचा प्रयत्न केल्याचा आरोप आहे.
मात्र भारतीय नागरिक असलेले कॅप्टन स्मित मच्छर यांनी प्रतिकार करत हा प्रयत्न हाणून पाडला. त्यांनी वेळेत कॉकपिटचा दरवाजा उघडल्यामुळे प्रवाशांना कॉकपिटमध्ये प्रवेश करता आला आणि त्यांनी सहवैमानिकाला ताब्यात घेतले.
या सहवैमानिकाची ओळख हमाम अल-हमामी अशी करण्यात आली आहे.
