इस्रायली वर्तमानपत्राच्या पहिल्या पानावर झळकले ‘नमस्ते’

पंतप्रधान नरेंद्र मोदी हे त्यांच्या दुसऱ्या इस्रायल दौऱ्यासाठी रवाना झाले असून या दोन्ही देशांचे संबंध भक्कम आहेत. या संबंधांना अधिक बळकटी मिळणार असून आणखी नवीन पैलू उलगडले जाण्याची शक्यता वर्तवण्यात येत आहे. अशातच इस्रायली वृत्तपत्र ‘द जेरुसलेम पोस्ट’ने भारतीय पंतप्रधानांच्या स्वागतासाठी एक विशेष मुखपृष्ठ छापले आहे. वृत्तपत्राचे मुख्य संपादक झ्विका क्लेन यांनी मुखपृष्ठाचा फोटो एक्सवर शेअर केला आहे.

इस्रायली वृत्तपत्र ‘द जेरुसलेम पोस्ट’चे मुख्य संपादक झ्विका क्लेन यांनी एक्सवर २४ फेब्रुवारी रोजी मुखपृष्ठाचा फोटो पोस्ट केला. त्यांनी म्हटले की, “पंतप्रधान नरेंद्र मोदी यांच्या २०१७ नंतरच्या पहिल्याच इस्रायल दौऱ्यापूर्वी आम्ही उद्याचा पेपर जेरुसलेममध्ये छापण्यासाठी पाठवला आहे. या प्रसंगी आमचे ‘द जेरुसलेम पोस्ट’चे हे खास कव्हर आहे. तुम्हाला काय वाटते?” तसेच त्यांनी पुढे बोलताना, त्यांच्या वाचकांना पंतप्रधानांचे स्वागत करण्यासाठी त्यांच्यासोबत सामील होण्याचे आवाहन केले. या मुखपृष्ठावर पंतप्रधान मोदींचा फोटो असून वर ‘नमस्ते’ असे देवनागरीमध्ये लिहिले आहे. याशिवाय आजूबाजूलाही इस्रायल आणि भारत यासंबंधीच्या बातम्या असल्याचे दिसत आहे.

बुधवारी, पंतप्रधान मोदी दुपारी ४ वाजता (भारतीय प्रमाणवेळेनुसार) इस्रायलमध्ये उतरतील. २०१७ नंतर मोदींचा हा पहिलाच इस्रायल दौरा आहे आणि ते इस्रायली पंतप्रधान बेंजामिन नेतान्याहू यांच्यासोबत द्विपक्षीय व्यापार, संरक्षण आणि सुरक्षा सहकार्यावर महत्त्वाच्या चर्चा करतील अशी अपेक्षा आहे. पंतप्रधान इस्रायली संसद, नेसेटला देखील संबोधित करतील. “भारत- इस्रायल धोरणात्मक भागीदारीत झालेल्या महत्त्वपूर्ण प्रगतीचा आढावा दोन्ही नेते घेतील आणि विज्ञान आणि तंत्रज्ञान, नवोन्मेष, संरक्षण आणि सुरक्षा, शेती, जल व्यवस्थापन, व्यापार आणि अर्थव्यवस्था आणि लोकांमधील देवाणघेवाण यासह सहकार्याच्या विविध क्षेत्रांमध्ये पुढील संधींवर चर्चा करतील. परस्पर हिताच्या प्रादेशिक आणि जागतिक मुद्द्यांवरही नेत्यांचे दृष्टिकोन आदानप्रदान होण्याची अपेक्षा आहे,” असे परराष्ट्र मंत्रालयाने म्हटले आहे.

हे ही वाचा:

‘अश्लील’ सामग्री स्ट्रीमिंग प्रकरणी पाच ओटीटी प्लॅटफॉर्म ब्लॉक

….तर भारत पाक संघर्षत ३.५ कोटी लोक मृत्युमुखी पडतील

“आयकराची जागा टॅरिफ घेईल” सर्वोच्च न्यायालयाच्या न्यायाधीशांसमोर ट्रम्प यांचा दावा

राजकोटमध्ये १,३०० हून अधिक अनधिकृत घरांवर बुलडोझर

इस्रायल- इराण संघर्ष सुरू झाल्यापासून गाझामधील सध्याच्या परिस्थितीवरही दोन्ही नेत्यांमध्ये महत्त्वाची चर्चा होण्याची अपेक्षा आहे. या भेटीपूर्वी, दोन्ही देशांनी दहशतवादाविरुद्ध शून्य सहनशीलतेबाबतची आपली भूमिका पुन्हा एकदा स्पष्ट केली. दोन्ही देशांनी या धोक्याचा सामना करण्यासाठी द्विपक्षीय सहकार्य वाढवण्याचे वचन दिले, ज्यामध्ये गुप्तचर आणि माहितीची देवाणघेवाण वाढवणे समाविष्ट आहे. मंगळवारी दोन्ही देशांनी यावर भर दिला की दहशतवादाचा सामना करण्यासाठी शाश्वत आणि व्यापक पद्धतीने एकत्रित कृती आवश्यक आहे.