मध्य पूर्वेतील तणाव दिवसेंदिवस अधिक गंभीर होत असून, अमेरिकेने होर्मुझ सामुद्रधुनी परिसरात इराणच्या लष्करी ठिकाणांवर नव्या हवाई कारवाया केल्या आहेत. या कारवाईत इराणची किनारपट्टीवरील क्षेपणास्त्र प्रणाली, हवाई संरक्षण यंत्रणा आणि इस्लामिक रिव्होल्युशनरी गार्ड कॉर्प्स (IRGC)च्या वेगवान स्पीडबोट्स लक्ष्य करण्यात आल्याची माहिती अमेरिकेच्या एका वरिष्ठ अधिकाऱ्याच्या हवाल्याने समोर आली आहे.
अमेरिकेच्या या कारवाईचा उद्देश होर्मुझ सामुद्रधुनीत व्यापारी जहाजांना निर्माण झालेला धोका कमी करणे आणि इराणची हल्ला करण्याची क्षमता खिळखिळी करणे हा असल्याचे सांगण्यात आले. अलीकडील काळात इराणने व्यापारी जहाजांवर तसेच आखाती देशांवरील हल्ल्यांची तीव्रता वाढवल्यानंतर अमेरिकेने ही लष्करी मोहीम राबवल्याचे वृत्त आहे.
अमेरिकेच्या कारवाईत इराणच्या दक्षिण किनारपट्टीवरील अनेक लष्करी ठिकाणांवर अचूक हल्ले करण्यात आले. यात किनारपट्टीवरील क्षेपणास्त्र प्रक्षेपण व्यवस्था, हवाई संरक्षण प्रणाली आणि सामुद्रधुनीत गस्त घालणाऱ्या आयआरजीसीच्या लहान वेगवान नौकांचा समावेश होता. अमेरिकेच्या मते, ही साधने व्यापारी जहाजे आणि नौदलासाठी मोठा धोका निर्माण करत होती.
दरम्यान, इराणने आपला दबाव वाढवत आखाती देशांतील काही ठिकाणांवर क्षेपणास्त्र आणि ड्रोन हल्ले केल्याचे वृत्त आहे. अमेरिकन लष्करी तळ असलेल्या काही देशांनाही लक्ष्य करण्यात आल्याचा दावा करण्यात आला आहे. त्यामुळे संपूर्ण आखात प्रदेशात सुरक्षा सतर्कता वाढविण्यात आली आहे.
हे ही वाचा:
ब्रिटनमध्ये उष्णतेचा कहर; दोन महिन्यांत २,७०० हून अधिक मृत्यू
आषाढी वारीला गालबोट; जेजुरीत ट्रकच्या धडकेत तीन महिला वारकऱ्यांचा मृत्यू
भायखळ्यात सात वर्षांच्या चिमुरडीवर सुरक्षा रक्षकाकडून लैंगिक अत्याचार
बँकॉकमध्ये पबला भीषण आग; २७ जणांचा मृत्यू
होर्मुझ सामुद्रधुनी ही जगातील सर्वात महत्त्वाच्या सागरी व्यापारी मार्गांपैकी एक मानली जाते. जगातील जवळपास पाचपैकी एक हिस्सा कच्चे तेल आणि मोठ्या प्रमाणातील एलएनजी (LNG) याच मार्गाने वाहतूक केली जाते. त्यामुळे या भागातील कोणताही संघर्ष जागतिक ऊर्जा बाजार, तेलाच्या किमती आणि पुरवठा साखळीवर थेट परिणाम करू शकतो.
अमेरिका आणि इराणमधील वाढत्या संघर्षामुळे जागतिक समुदायात चिंता वाढली आहे. संयुक्त राष्ट्रांसह अनेक देशांनी संयम बाळगण्याचे आणि तणाव कमी करण्यासाठी राजनैतिक मार्ग स्वीकारण्याचे आवाहन केले आहे. मात्र, दोन्ही बाजूंकडून सुरू असलेल्या प्रत्युत्तरात्मक कारवायांमुळे परिस्थिती आणखी चिघळण्याची भीती व्यक्त केली जात आहे.
