देशातील चार राज्यांत झालेल्या विधान परिषद निवडणुकांत काँग्रेसच्या खात्यात मोठा भोपळा आला. ज्या कर्नाटकमध्ये काँग्रेसचे सरकार आहे, तिथल्या चारही विधान परिषद जागांवर काँग्रेसचा पराभव झाला. त्यावरून भाजपाने कर्नाटकचे मुख्यमंत्री डी. के. शिवकुमार यांची खिल्ली उडवली आहे. विधान परिषदेच्या निवडणुकीत काँग्रेसला चारही जागांवर पराभवाचा सामना करावा लागला असून, भाजप आणि त्यांचा मित्रपक्ष जनता दल (धर्मनिरपेक्ष) अर्थात जेडीएसने या निवडणुकीत विजय मिळवला आहे.
“डीके इट्स डन ब्रो… अर्थात, डीके, आता सगळं संपलं, भाऊ! एमएलसी निवडणुकीत एनडीएने शिक्षक आणि पदवीधर मतदारसंघांच्या चारही जागांवर ४ पैकी ४ जागा जिंकून दणदणीत विजय मिळवला!” असे भाजपच्या कर्नाटक युनिटने एक्सवर पोस्ट केले. या पोस्टसोबत शिवकुमार यांच्या डोक्यावर झेंडूची फुले ठेवलेला फोटोही शेअर करण्यात आला.
हा फोटो फेब्रुवारी २०२३ मधील आहे. त्यावेळी तत्कालीन मुख्यमंत्री बसवराज बोम्मई यांनी सादर केलेल्या राज्याच्या अर्थसंकल्पाच्या निषेधार्थ शिवकुमार यांनी विधानसौधामध्ये अनोख्या पद्धतीने आंदोलन केले होते. आता काँग्रेसच्या नेत्याला टोला लगावण्यासाठी भाजपने त्याच जुन्या फोटोचा वापर केला आहे.
जेडीएसने बंगळुरू शिक्षक मतदारसंघाची जागा काँग्रेसकडून हिसकावून घेतली. तर भाजपने उत्तर-पूर्व शिक्षक, दक्षिण-पूर्व पदवीधर आणि पश्चिम पदवीधर मतदारसंघांच्या जागा कायम राखल्या. बंगळुरूमध्ये भाजपच्या पाठिंब्यावर निवडणूक लढवणारे जेडीएसचे उमेदवार ए.पी. रंगनाथ यांनी पुन्हा निवडणूक लढवणारे काँग्रेसचे विद्यमान आमदार पुट्टण्णा यांचा ९०८ मतांनी पराभव केला.
उत्तर-पूर्व शिक्षक मतदारसंघात भाजपचे विद्यमान आमदार शशिल जी. नामोशी यांनी काँग्रेसचे उमेदवार शरणप्पा मत्तूर यांचा पराभव केला, अशी माहिती अधिकाऱ्यांनी दिली. कलबुर्गीचा समावेश असलेल्या या मतदारसंघातून नामोशी यांनी पाचव्यांदा विजय मिळवला आहे. कलबुर्गी हे काँग्रेस अध्यक्ष मल्लिकार्जुन खरगे यांचे राजकीय गड मानले जाते.
या निकालामुळे काँग्रेसला मोठा धक्का बसला आहे. काँग्रेसला आपली एकमेव जागा कायम राखण्यासोबतच इतर मतदारसंघांमध्येही चांगली कामगिरी करण्याची अपेक्षा होती. या चारही जागांसाठी २३ ऑक्टोबर रोजी मतदान झाले होते आणि यावेळी मतदानासाठी मतपत्रिकांचा वापर करण्यात आला होता.
काँग्रेस आता पेपरचोरीचा आरोप करणार?
या निकालाच्या पार्श्वभूमीवर जेडीएसच्या युवा शाखेचे अध्यक्ष निखिल कुमारस्वामी यांनी काँग्रेसचे ज्येष्ठ नेते राहुल गांधी यांच्या ‘मतचोरी’च्या आरोपांवरून त्यांच्यावर जोरदार हल्लाबोल केला. “ईव्हीएमला दोष देण्यासाठी काहीही नाही, राज्यातील यंत्रणा तुमच्या हातात आहे आणि निवडणूक मतपत्रिकेद्वारे घेण्यात आली,” असे त्यांनी एक्सवरील पोस्टमध्ये म्हटले. तसेच, आता आपल्या पराभवासाठी काँग्रेस ‘पेपर चोरी’ला दोष देणार का, असा सवालही त्यांनी केला.
कर्नाटकमध्ये भाजप आणि जेडीएस हे आघाडीतील भागीदार आहेत. या एमएलसी निवडणुका दोन्ही पक्षांमधील समन्वयाची तसेच एकमेकांच्या उमेदवारांना पाठिंबा हस्तांतरित करण्याच्या क्षमतेची कसोटी मानल्या जात होत्या. या निवडणुकीत विरोधी आघाडीने वर्चस्व मिळवल्याने सत्ताधारी काँग्रेसला लक्ष्य करण्यासाठी भाजप आणि जेडीएसच्या हातात आता आणखी एक मुद्दा आला आहे.
