समाजवादी पक्षाचे संस्थापक आणि उत्तर प्रदेशचे माजी मुख्यमंत्री मुलायमसिंह यादव यांचे धाकटे पुत्र प्रतीक यादव यांचे बुधवारी लखनौ येथे दुःखद निधन झाले. ते अवघे ३८ वर्षांचे होते. अचानक प्रकृती बिघडल्याने कुटुंबीयांनी त्यांना तातडीने रुग्णालयात नेले, मात्र डॉक्टरांनी त्यांना मृत घोषित केले. या घटनेमुळे यादव कुटुंबावर मोठा आघात झाला असून उत्तर प्रदेशच्या राजकीय वर्तुळात शोककळा पसरली आहे.
प्रतीक यादव हे भाजप नेत्या अपर्णा यादव यांचे पती होते. अपर्णा यादव सध्या उत्तर प्रदेश महिला आयोगाच्या उपाध्यक्ष पदावर कार्यरत आहेत. समाजवादी पक्षाचे अध्यक्ष अखिलेश यादव यांचे ते सावत्र भाऊ होते. राजकीय घराण्याशी संबंध असूनही प्रतीक यादव यांनी सक्रिय राजकारणापासून नेहमीच अंतर ठेवले होते. ते फिटनेसप्रेमी म्हणून ओळखले जात होते आणि सोशल मीडियावरही त्यांची मोठी चर्चा असायची.
हे ही वाचा:
कांदिवली पूर्वमधील नाट्यगृहाचा मार्ग झाला मोकळा
NEET घोटाळा: १० लाखांचा पेपर १५ लाखांना विकला, सीबीआयने केली अटक
जे. जे. रुग्णालयातील निवासी डॉक्टरची आत्महत्या
आम्हाला आमच्या कामगिरीचा अभिमान आहे
मिळालेल्या माहितीनुसार, काही दिवसांपूर्वी त्यांची प्रकृती खालावल्याने त्यांना मेदांता रुग्णालयात दाखल करण्यात आले होते. उपचारानंतर प्रकृती सुधारल्यामुळे त्यांना घरी सोडण्यात आले होते. मात्र बुधवारी पहाटे अचानक त्यांची तब्येत पुन्हा बिघडली. कुटुंबीयांनी तातडीने त्यांना लखनौतील सिव्हिल हॉस्पिटलकडे नेले, परंतु डॉक्टरांनी तपासणीनंतर त्यांचा मृत्यू झाल्याचे जाहीर केले. त्यांच्या मृत्यूमागील नेमके कारण अद्याप स्पष्ट झालेले नसून शवविच्छेदन अहवालानंतर अधिक माहिती समोर येणार असल्याचे सांगण्यात येत आहे.
दरम्यान, या प्रकरणी लखनौ पोलिसांनी चौकशी सुरू केली आहे. पोलिसांनी प्रतीक यादव यांचा मोबाईल ताब्यात घेतला असून घरातील परिस्थिती आणि घटनाक्रमाची माहिती गोळा केली जात आहे. काही वृत्तांनुसार, ते घरातील स्वयंपाकघरात बेशुद्ध अवस्थेत आढळले होते. त्यामुळे पोलिस सर्व बाजूंनी तपास करत आहेत.
प्रतीक यादव यांच्या निधनाची बातमी समोर येताच विविध राजकीय पक्षांच्या नेत्यांनी शोक व्यक्त केला. उत्तर प्रदेशचे मुख्यमंत्री योगी आदित्यनाथ यांनीही दुःख व्यक्त करत श्रद्धांजली अर्पण केली. समाजवादी पक्षाने सोशल मीडियावर पोस्ट करत ही अत्यंत वेदनादायी घटना असल्याचे म्हटले आहे. समर्थक आणि कार्यकर्त्यांकडूनही यादव कुटुंबाला धीर दिला जात आहे.
मुलायमसिंह यादव यांच्या निधनानंतर यादव कुटुंब आधीच भावनिक परिस्थितीतून जात असताना आता प्रतीक यादव यांच्या अकस्मात जाण्यामुळे कुटुंबीयांवर पुन्हा दुःखाचा डोंगर कोसळला आहे. राजकारणापासून दूर राहून स्वतःची स्वतंत्र ओळख निर्माण करणाऱ्या प्रतीक यादव यांच्या निधनामुळे अनेकांनी हळहळ व्यक्त केली आहे.
