हायवेवर सत्ताधाऱ्यांचे गनतंत्र

मुंबई पुणे द्रुतगती मार्गावर शिवसेनेचा लोगो असलेल्या गाडीतून पिस्तूल दाखवून दमदाटी करण्याचा प्रकार उघड झाला आहे. या प्रकारचा एक व्हिडिओ ट्विटरवर मोठ्या प्रमाणात व्हायरल झाला आहे. हा व्हिडिओ व्हायरल झाल्यावर ट्विटरवर अनेकांनी चिंता या प्रकरणी चिंता प्रकट केली.

हे प्रकरण समाजमाध्यमांमधून गाजत असल्याचे लक्षात आल्यावर मुंबई पोलिसांनी त्वरीत या प्रकरणाची दाखल घेतली आणि व्हिडिओ शेअर करणाऱ्यांनाच या घटनेचे ‘अचूक स्थान’ पाठवण्याची विनंती केली.

पोलिसांच्या या प्रश्नावर अनेक नेटकऱ्यांनी पोलिसांना तातडीने सर्व माहिती पुरवली. यामध्ये गाडीचा नंबर, चालकाचे नाव, गाडीच्या नोंदणीची माहिती हा सर्व तपशील देण्यात आला आहे.

काही नेटकऱ्यांनी माहिती पुरवण्याबरोबरच पोलिसांच्या कार्यक्षमतेवर प्रश्नचिन्हही उपस्थित केले. तर काहींनी पोलिसांवर राजकीय दबाव असल्याचा आरोप केला.

काल रात्री (२९ जानेवारी) घडलेल्या या घटनेवर जेंव्हा आज सकाळी (३० जानेवारी) मुंबई पोलिसांनी ही केस पुणे पोलिसांकडे जाण्यासाठी त्यांना ट्विटमध्ये टॅग केले तेंव्हासुध्दा नेटकरी संतापले. बोरिवलीची गाडी असूनही तपस करण्यासाठी पुणे पोलिसांना का टॅग केले गेले असा सवालही काहींनी विचारला.

दरम्यान या प्रकरणी मुंबई किंवा पुणे कोणत्याही पोलिसांनी कोणतीही कारवाई केल्याची माहिती मिळालेली नाही.