दिल्लीतील रामलीला मैदानावर रविवारी झालेल्या इंडिया आघाडीच्या रॅलीवरून भाजपने काँग्रेसला लक्ष्य केले. या सभेला १० लाख लोक उपस्थित राहतील, असा दावा काँग्रेसने केला होता. मात्र, प्रत्यक्षात एवढी गर्दी जमली नसल्याचा आरोप करत भाजपने काँग्रेसच्या दाव्यावर प्रश्नचिन्ह उपस्थित केले.
भाजपचे खासदार संबित पात्रा यांनी पत्रकार परिषद घेऊन काँग्रेसच्या दाव्यांवर टीका केली. सकाळपासून भाजप या रॅलीवर लक्ष ठेवून होते आणि विरोधी पक्षनेते राहुल गांधी यांचे भाषणही ऐकत होते. मात्र, हा संपूर्ण कार्यक्रम म्हणजे वेळेचा अपव्यय असल्याचे त्यांनी म्हटले. रामलीला मैदानावरील दृश्यांचा दाखला देत त्यांनी सांगितले की, काँग्रेसने १० लाख लोक उपस्थित राहण्याचा दावा केला असतानाही मैदानाचा मोठा भाग रिकामा होता.
“१० लाख लोक कुठे होते? आम्हाला दाखवा,” असा सवाल पात्रा यांनी केला. मोठ्या प्रमाणावर गर्दी जमल्याचा आभास निर्माण करण्यासाठी काँग्रेसने ‘ट्रिक फोटोग्राफी’चा वापर केल्याचा आरोपही त्यांनी केला.
हे ही वाचा:
कर्नाटकातला धर्मांतरविरोधी कायदा रद्द करण्याची ख्रिस्ती धर्मगुरूंची मागणी
वनमंत्री गणेश नाईक यांनी केले ‘लोहपुरुष’ दसरा-दिवाळी अंकाचे कौतुक
बिनान्सकडून ६.३ अब्ज डॉलरच्या चोरीतील ९५% नुकसान भरून काढले
काँग्रेसचे नेते के. सी. वेणुगोपाल आणि पवन खेरा यांच्या विधानांचा संदर्भ देत संबित पात्रा म्हणाले की, या रॅलीसाठी १० लाखांहून अधिक लोक उपस्थित राहतील, असे काँग्रेसने सांगितले होते. रामलीला मैदान सुमारे १० ते १२ एकर क्षेत्रात पसरलेले आहे. व्यासपीठ आणि त्यासमोरील राखीव जागा मिळून मैदानाच्या जवळपास १५ टक्के भागाचा वापर झाला होता. उर्वरित जागेपैकी जवळपास ४० टक्के भाग रिकामा असल्याचा दावा पात्रा यांनी केला.
रॅलीतील खुर्च्यांकडे लक्ष वेधताना ते म्हणाले की, मैदानात एकूण २८ हजार खुर्च्या ठेवण्यात आल्या होत्या. त्यापैकी सुमारे ५ हजार ते ७ हजार खुर्च्या रिकाम्या होत्या. त्यामुळे काँग्रेसच्या १० लाख लोकांच्या उपस्थितीच्या दाव्यावर प्रश्न निर्माण होतात, असे त्यांनी सांगितले.
“एवढे पक्ष आणि झेंडे एकत्र आणूनही त्यांना १० लाख लोक जमवता आले नाहीत,” अशी टीका पात्रा यांनी केली. राहुल गांधी यांच्यावर निशाणा साधताना पात्रा म्हणाले की, पंतप्रधान होण्यासाठी कठोर परिश्रम करावे लागतात. ‘पसीना’ म्हणजे घाम आणि ‘मेहनत’ म्हणजे परिश्रम, या दोन शब्दांवर भर देत त्यांनी ‘प्राइम मिनिस्टर’मधील ‘पी’ आणि ‘एम’चा उल्लेख केला.
