फॉर्म्युला वन विश्वचषकावर नाव कोरणारे ऑस्ट्रेलियाचे माजी दिग्गज रेसिंगपटू अ‍ॅलन जोन्स यांचे वयाच्या ८० व्या वर्षी निधन झाले. ५ नोव्हेंबर रोजी दीर्घ आजाराने त्यांची प्राणज्योत मालवली. त्यांच्या निधनाने जागतिक मोटरस्पोर्ट विश्वावर शोककळा पसरली आहे. नुकतेच त्यांना कर्करोगाचे निदान झाल्याचे वृत्त होते. त्यांच्या पत्नी अमांडा बटर-डेव्हिस यांनी मोटरस्पोर्ट ऑस्ट्रेलियाच्या माध्यमातून निधनाची माहिती दिली.
अ‍ॅलन जोन्स यांनी १९८० मध्ये विल्यम्स संघाकडून फॉर्म्युला वन ड्रायव्हर्स वर्ल्ड चॅम्पियनशिप जिंकण्याचा पराक्रम केला होता. सर जॅक ब्रॅबहॅम यांच्यानंतर हा किताब पटकावणारे ते दुसरे ऑस्ट्रेलियन ड्रायव्हर ठरले. आपल्या कारकिर्दीत त्यांनी तब्बल १२ ग्रँड प्रिक्स शर्यती जिंकल्या. आक्रमक ड्रायव्हिंग शैली आणि प्रतिस्पर्ध्यांना कडवी टक्कर देण्याच्या वृत्तीमुळे त्यांची मोटरस्पोर्ट विश्वात वेगळी ओळख निर्माण झाली होती.
फॉर्म्युला वनमध्ये शर्यत जिंकणाऱ्या मोजक्या ऑस्ट्रेलियन खेळाडूंमध्ये जोन्स यांचा समावेश होता. जॅक ब्रॅबहॅम, मार्क वेबर, डॅनियल रिकियार्डो आणि ऑस्कर पियास्त्री यांच्यासोबत त्यांनी ऑस्ट्रेलियाच्या मोटरस्पोर्ट इतिहासात मानाचे स्थान मिळवले.
ऑस्ट्रेलियन ग्रँड प्रिक्स कॉर्पोरेशननेही त्यांच्या निधनाबद्दल तीव्र दुःख व्यक्त केले. १९८० मधील त्यांच्या विश्वविजेतेपदाने ऑस्ट्रेलियातील मोटरस्पोर्ट चाहत्यांच्या एका पिढीला प्रेरणा दिली. त्याच वर्षी ऑस्ट्रेलियन ग्रँड प्रिक्समध्ये त्यांनी मिळवलेला विजय हा आपल्या मायदेशातील ग्रँड प्रिक्स जिंकणाऱ्या ऑस्ट्रेलियन ड्रायव्हरचा अखेरचा विजय ठरला होता. त्यांच्या निधनाने जागतिक मोटरस्पोर्ट क्षेत्राने एक महान विजेता गमावला आहे.
