अंडर-१९ विश्वचषकातील पहिल्याच सामन्यात भारताने अमेरिकेची पुरती दाणादाण उडवली. अंडर-१९ विश्वचषक मध्ये भारताने संयुक्त राज्य अमेरिका अंडर-१९ संघाला अवघ्या १०७ धावांत गुंडाळलं. भारताकडून हेनिल पटेल याने भन्नाट मारा करत ५ विकेट्स घेतल्या.
भारताचा कर्णधार आयुष म्हात्रे याने नाणेफेक जिंकून अमेरिकेला आधी फलंदाजीस पाठवलं. सामना सुरू होताच अमेरिकेला पहिला धक्का बसला. अवघ्या १.३ षटकांत अमरिंदर गिल फक्त १ धाव करून बाद झाला.
यानंतर अर्जुन महेश आणि साहिल गर्ग यांनी थोडा वेळ डाव सावरण्याचा प्रयत्न केला. दोघांनी मिळून ४५ चेंडूत २८ धावा जोडल्या. पण साहिल १६ धावांवर बाद होताच अमेरिकेच्या विकेट्स अक्षरशः कोसळायला लागल्या. संघाने ३९ धावांतच आपले पाच फलंदाज गमावले.
मधल्या फळीत नीतीश सुदिनी आणि अदनित झांब यांनी थोडी झुंज दिली. दोघांमध्ये पाचव्या विकेटसाठी ३० धावांची भागीदारी झाली. अदनित १८ धावा करून बाद झाला, तर नीतीशने ५२ चेंडूत ३६ धावा केल्या. मात्र ही झुंज अपुरी ठरली.
भारताकडून हेनिल पटेलने ७ षटकांत फक्त १६ धावा देत ५ गडी बाद केले. याशिवाय दीपेश देवेंद्रन, आर. एस. अंबरीश, खिलन पटेल आणि वैभव सूर्यवंशी यांनी प्रत्येकी एक विकेट घेतली.
एकूणच, भारतीय गोलंदाजांसमोर अमेरिकेची फलंदाजी पूर्णपणे ढासळली. विश्वचषकाच्या पहिल्याच सामन्यात भारताने जोरदार इशारा दिला आहे—इथे सामना सोपा नाही!
