आयपीएल २०२६ ची सुरुवात मुंबई इंडियन्सने दमदार विजयाने केली. रविवारी वानखेडे मैदानावर झालेल्या सामन्यात मुंबईने कोलकाता नाइट रायडर्सवर ६ विकेट्सनी मात केली. या विजयाचा खरा शिल्पकार ठरला रोहित शर्मा. त्याने ७८ धावांची झंझावाती खेळी करत संघाला विजय मिळवून दिला.
या सामन्यात रोहितने एक मोठा विक्रम आपल्या नावावर केला. आयपीएलमध्ये एका संघाविरुद्ध सर्वाधिक धावा करणारा फलंदाज म्हणून तो आता अव्वल स्थानावर पोहोचला आहे. रोहितने केकेआरविरुद्ध एकूण ११६१ धावा केल्या असून, त्याने विराट कोहलीचा ११५९ धावांचा विक्रम मागे टाकला. तसेच, कोलकाताविरुद्ध सर्वाधिक धावा करणारा फलंदाज म्हणूनही रोहितने डेव्हिड वॉर्नरचा (१०९३ धावा) विक्रम मोडला.
सामन्यात रोहित शानदार फॉर्ममध्ये दिसला. त्याने रयान रिकेल्टनसोबत पहिल्या विकेटसाठी फक्त ११.५ षटकांत १४८ धावांची भागीदारी केली. रोहितने ३८ चेंडूत ७८ धावा करताना ६ चौकार आणि ६ षटकार ठोकले. दुसरीकडे रिकेल्टनने ४३ चेंडूत ८१ धावांची तुफानी खेळी केली.
या दोघांच्या दमदार फलंदाजीच्या जोरावर मुंबई इंडियन्सने २२१ धावांचे मोठे लक्ष्य १९.१ षटकांत ४ विकेट्स गमावून सहज गाठले. आयपीएल इतिहासातील हा मुंबईचा सर्वात मोठा यशस्वी रनचेस ठरला. याआधी २०२१ मध्ये चेन्नईविरुद्ध २२१ धावांचे लक्ष्य त्यांनी पूर्ण केले होते.
यापूर्वी नाणेफेक गमावून प्रथम फलंदाजी करताना कोलकाताने २० षटकांत ४ बाद २२० धावा केल्या. कर्णधार अजिंक्य रहाणेने ४० चेंडूत ६७ धावा करत संघाला भक्कम सुरुवात दिली. फिन अ‍ॅलनने १७ चेंडूत ३७ धावा झळकावल्या, तर अंगकृष रघुवंशीने २९ चेंडूत ५१ धावा केल्या. शेवटी रिंकू सिंगने २१ चेंडूत नाबाद ३३ धावांची खेळी केली.
रोहित शर्माच्या विक्रमी खेळीमुळे मुंबईने हंगामाची सुरुवात दणक्यात करत प्रतिस्पर्ध्यांना स्पष्ट इशारा दिला आहे.
