दोन वेळा ऑलिम्पिक पदक विजेती नेमबाज मनू भाकरला आशियाई क्रीडा स्पर्धा २०२६ मध्ये निराशेला सामोरे जावे लागले. महिलांच्या १० मीटर एअर पिस्तूल वैयक्तिक स्पर्धेत तिला पदक मिळवता आले नाही. बुधवारी झालेल्या अंतिम फेरीत मनू भाकर पाचव्या स्थानावर राहिली.
दक्षिण कोरियाच्या गाउन चू हिने २४६.३ गुणांसह आशियाई विक्रम आणि आशियाई क्रीडा स्पर्धेचा विक्रम नोंदवत सुवर्णपदक पटकावले. चीनच्या यियाओ शेन हिने २४१.३ गुणांसह रौप्यपदक, तर रॅनक्सिन जियांग हिने २२१.६ गुणांसह कांस्यपदक जिंकले.
मनू भाकरने पात्रता फेरीत ५७९ गुण मिळवत तिसरे स्थान पटकावले होते. या कामगिरीत तिच्या नावावर २० ‘इनर-१०’ गुण होते. त्यामुळे तिने महिलांच्या आठ खेळाडूंच्या अंतिम फेरीत प्रवेश केला. अंतिम फेरीत मनूने १८१.१ गुण मिळवले आणि ती पाचव्या स्थानावर राहिली. महिलांच्या १० मीटर एअर पिस्तूल सांघिक स्पर्धेतही भारताला पदकाने हुलकावणी दिली होती. त्यामुळे या स्पर्धेत भारताच्या पदकाच्या आशांना मोठा धक्का बसला.
आता मनू भाकरचे लक्ष २५ मीटर पिस्तूल स्पर्धेकडे असेल. या स्पर्धेत ती ईशा सिंह आणि २०१८च्या आशियाई क्रीडा स्पर्धेची विजेती राही सरनोबत यांच्यासोबत भारताचे प्रतिनिधित्व करणार आहे. १० मीटर एअर पिस्तूलच्या वैयक्तिक स्पर्धेत सहभागी झालेल्या अन्य भारतीय खेळाडूंना अंतिम फेरीत प्रवेश करता आला नाही. ईशा सिंहने ५७२ गुणांसह १५वे स्थान, तर सुरुचीने ५६८ गुणांसह २६वे स्थान मिळवले.
हे ही वाचा:
पाचव्या स्थानावर राहिल्यामुळे मनू भाकरचे स्वप्न भंगले
साहिल वाकोडे मृत्यू प्रकरणी १० सदस्यीय समिती करणार चौकशी
साहिल वाकोडे प्रकरणाचा विचका कुणाला करायचाय ?
अजनार नदीपासून यमुनेपर्यंत ‘बिट्टू तबाही’ची स्वच्छता मोहीम
मनू भाकरने हांगझोऊ येथे झालेल्या मागील आशियाई क्रीडा स्पर्धेत वैयक्तिक पदक जिंकले नव्हते. यावेळी वैयक्तिक पदक मिळवून त्या अपयशाची भरपाई करण्याचा तिचा प्रयत्न होता; मात्र तिला त्यात यश आले नाही. २०२३मध्ये मनू भाकर ही रिदम सांगवान आणि ईशा सिंह यांच्यासह महिलांच्या २५ मीटर पिस्तूल सांघिक संघाचा भाग होती. या संघाने हांगझोऊ येथे सुवर्णपदक जिंकले होते.
स्कीटमध्ये भारताला कांस्यपदक
दरम्यान, बुधवारीच रझिया ढिल्लों, माहेश्वरी चौहान आणि परिनाझ धालीवाल यांच्या महिला स्कीट संघाने पात्रता फेरीत एकूण ३३१ गुण मिळवत महिला स्कीट सांघिक स्पर्धेत कांस्यपदक जिंकले. आशियाई क्रीडा स्पर्धा २०२६ मध्ये नेमबाजीत भारताने पहिले पदक महिलांच्या १० मीटर एअर रायफल सांघिक स्पर्धेत मिळवले होते. इलावेनिल वलारिवन, सोनम मस्कर आणि विदर्शा विनोद यांच्या त्रिकुटाने रौप्यपदक जिंकले होते. यानंतर इलावेनिल वलारिवनने याच प्रकारातील वैयक्तिक स्पर्धेतही रौप्यपदक पटकावले.
पुरुषांच्या १० मीटर एअर रायफल सांघिक स्पर्धेत हिमांशू ढिल्लों आणि रुद्राक्ष पाटील यांनी रौप्यपदक जिंकले. त्यानंतर वैयक्तिक स्पर्धेत हिमांशूने रौप्यपदक, तर रुद्राक्षने कांस्यपदक मिळवले.
