घरस्पोर्ट्सविश्वविजेत्या स्पेनचा कणा डळमळला!

विश्वविजेत्या स्पेनचा कणा डळमळला!

पाठीच्या दुखापतीमुळे रोड्रीवर शस्त्रक्रियेची वेळ

स्पेनला २०२६ च्या फिफा विश्वचषकाचे विजेतेपद मिळवून देणारा कर्णधार रोड्री पुन्हा एकदा दुखापतीमुळे चर्चेत आला आहे. पाठीच्या दुखापतीमुळे त्याच्यावर लवकरच शस्त्रक्रिया होण्याची शक्यता असल्याचे वृत्त समोर आले असून, त्यामुळे तो बराच काळ फुटबॉलपासून दूर राहू शकतो.

रोड्रीच्या दुखापतीमुळे स्पेन आणि त्याचा क्लब मँचेस्टर सिटी या दोघांच्याही अडचणी वाढल्या आहेत. २०२६ च्या विश्वचषकात रोड्रीने मिडफिल्डमध्ये दमदार कामगिरी करत स्पेनच्या विजेतेपदात मोलाचा वाटा उचलला होता. त्याच्या उत्कृष्ट प्रदर्शनासाठी त्याला स्पर्धेतील सर्वोत्कृष्ट खेळाडू (गोल्डन बॉल) पुरस्कारानेही गौरविण्यात आले.

मात्र, गेल्या काही वर्षांपासून रोड्रीला दुखापतींनी सतत त्रास दिला आहे. सप्टेंबर २०२४ मध्ये लिगामेंटच्या गंभीर दुखापतीमुळे तो जवळपास संपूर्ण २०२४-२५ हंगामाला मुकला होता. त्यानंतर हॅमस्ट्रिंग आणि ग्रोइनच्या समस्यांमुळे त्याचे पुनरागमनही वारंवार लांबले. मागील हंगामात त्याला सर्व स्पर्धांमध्ये केवळ ३३ सामने खेळता आले, तर प्रीमियर लीगमध्ये फक्त १७ सामन्यांत तो सुरुवातीच्या संघात होता.

दुखापतीतून पुनरागमन केल्यानंतरही रोड्री पूर्वीसारख्या लयीत दिसला नाही. मँचेस्टर सिटीचे तत्कालीन प्रशिक्षक पेप गार्डिओला यांनीही त्याला घाईघाईने मैदानात उतरविल्याची कबुली दिली होती. त्यामुळे तो पूर्णपणे तंदुरुस्त होण्यापूर्वीच खेळल्याचे बोलले जात आहे.

दरम्यान, रोड्रीच्या कराराचा मँचेस्टर सिटीसोबत अवघा एक वर्षाचा कालावधी शिल्लक असून, तो आपल्या माजी क्लब रिअल माद्रिदमध्ये पुनरागमन करण्यास इच्छुक असल्याच्या चर्चांनाही उधाण आले आहे.

रोड्रीच्या अनुपस्थितीचा परिणाम कमी करण्यासाठी मँचेस्टर सिटीने यंदाच्या उन्हाळी ट्रान्सफर विंडोमध्ये नॉटिंगहॅम फॉरेस्टकडून इलियट अँडरसनची मोठ्या रकमेत खरेदी केली आहे. तसेच, रोड्री रिअल माद्रिदमध्ये दाखल झाल्यास ऑरेलियन चौमेनी आणि एडुआर्डो कामाविंगा यांच्या भवितव्यावरही त्याचा परिणाम होऊ शकतो. चौमेनीवर मँचेस्टर युनायटेडची नजर असल्याचे सांगितले जात असले, तरी त्याची मोठी ट्रान्सफर फी अडथळा ठरत आहे. कामाविंगामध्ये मँचेस्टर सिटी, चेल्सी आणि आर्सेनल यांनाही रस असल्याची चर्चा आहे.

रिअल माद्रिद या दोन्ही खेळाडूंना क्लब सोडण्याची परवानगी देणार का, याकडे आता फुटबॉलविश्वाचे लक्ष लागले आहे.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा

The reCAPTCHA verification period has expired. Please reload the page.

Exit mobile version