विजय हजारे ट्रॉफी २०२५-२६ च्या एलीट सेमीफायनल-१ मध्ये विदर्भाने जबरदस्त कामगिरी करत कर्नाटकला ६ विकेट्सने मात दिली आणि थेट फायनलमध्ये धडक मारली. आता फायनलमध्ये विदर्भाचा सामना सौराष्ट्र–पंजाब सेमीफायनल-२ च्या विजेत्याशी होणार आहे. हा सामना १६ जानेवारीला खेळवला जाणार असून फायनल १८ जानेवारीला होणार आहे.
बीसीसीआय सेंटर ऑफ एक्सलन्स ग्राउंड-१ येथे झालेल्या या सामन्यात कर्नाटकने नाणेफेक जिंकून प्रथम फलंदाजी घेतली; पण संपूर्ण संघ ४९.४ षटकांत २८० धावांवर आटोपला. सुरुवातीलाच २० धावांत दोन विकेट्स गेल्यानंतर ध्रुव प्रभाकर (२८) आणि करुण नायर यांनी संघ सावरला. पुढे करुण नायरने के.एल. श्रीजीतसोबत मोठी भागीदारी रचत ७६ धावा केल्या, तर श्रीजीतने ५४ धावा जोडल्या. श्रेयस गोपाल (३६) आणि अभिनव मनोहर (२६) यांनीही उपयोगी धावा केल्या. विदर्भाकडून दर्शन नालकंडेने ५ विकेट्स घेत कर्नाटकची कंबर मोडली.
लक्ष्याचा पाठलाग करताना विदर्भाची सुरुवात थोडी अडखळली. अवघ्या ९ धावांवर अथर्व तायडे बाद झाला. त्यानंतर अमन मोखाडे आणि ध्रुव शौरे यांनी संघाला सावरत दुसऱ्या विकेटसाठी ९८ धावांची भागीदारी केली. शौरे ४७ धावांवर बाद झाला. इथून पुढे अमन मोखाडे आणि समर्थ आर. यांनी तिसऱ्या विकेटसाठी १४७ धावांची निर्णायक भागीदारी रचली.
हेही वाचा :
पुणे–पिंपरी-चिंचवडमध्ये भाजपचा पवारांना धक्का
वेन्यू बदलाच्या वादात आयसीसी थेट बांगलादेशात येणार
टी-20 विश्वचषकापूर्वी पाकिस्तानला दिलासा, शाहीन आफ्रिदी नेट्समध्ये परतला
भारतीय सशत्र दल: अदम्य धैर्य, शौर्य आणि अढळ दृढनिश्चय…
अमन मोखाडेने अफलातून फलंदाजी करत १२२ चेंडूंमध्ये १३८ धावा ठोकल्या—यात २ षटकार आणि १२ चौकारांचा समावेश होता. शेवटी समर्थ आर. ने नाबाद ७६ धावा करत विदर्भाला विजयरेषा ओलांडून दिली. कर्नाटककडून अभिलाष शेट्टीने ३ विकेट्स घेतल्या.
या विजयासह विदर्भाने आत्मविश्वासाने फायनल गाठला असून आता सर्वांच्या नजरा १८ जानेवारीच्या फायनलकडे लागल्या आहेत.
