कतारच्या रास लाफान औद्योगिक शहरात झालेल्या भीषण स्फोटात १२ भारतीय नागरिकांचा मृत्यू झाल्याच्या वृत्ताने परराष्ट्र मंत्री एस. जयशंकर यांनी तीव्र दुःख व्यक्त केले आहे. या दुर्घटनेनंतर भारत सरकारने तातडीने मदतकार्य सुरू केले असून दोहा येथील भारतीय दूतावासाला प्रभावित कुटुंबीयांच्या मदतीसाठी विशेष निर्देश देण्यात आले आहेत.
रविवारी रात्री बरझान येथील गॅस पुरवठा केंद्रात झालेल्या स्फोटात एकूण १३ जणांचा मृत्यू झाला, त्यापैकी १२ जण भारतीय नागरिक असल्याची माहिती समोर आली आहे. या घटनेनंतर जयशंकर यांनी सोशल मीडिया प्लॅटफॉर्म ‘एक्स’वर शोकसंदेश पोस्ट करत सरकारची भूमिका स्पष्ट केली.
“कतारच्या रास लाफान औद्योगिक शहरात झालेल्या स्फोटात भारतीय नागरिकांसह झालेल्या जीवितहानीमुळे आम्ही अत्यंत व्यथित आहोत. दोहा येथील भारतीय दूतावास कतारी अधिकाऱ्यांच्या सतत संपर्कात असून या दुर्घटनेमुळे प्रभावित झालेल्या भारतीय नागरिकांच्या कुटुंबीयांना मदत करण्यासाठी प्रयत्न करत आहे. आमच्या संवेदना आणि प्रार्थना पीडित व त्यांच्या कुटुंबीयांसोबत आहेत,” असे जयशंकर यांनी आपल्या संदेशात म्हटले.
Deeply saddened by the loss of lives and injuries, including of Indian nationals, in the explosion at Qatar’s Ras Laffan Industrial City.
As further details emerge, our Embassy continues to be in touch with Qatari authorities, and is reaching out to render assistance to the… https://t.co/tHifrYGvPT
— Dr. S. Jaishankar (@DrSJaishankar) June 22, 2026
जयशंकर यांच्या प्रतिक्रियेनंतर परराष्ट्र मंत्रालयानेही परिस्थितीवर बारकाईने लक्ष ठेवले असल्याचे स्पष्ट केले. दोहा येथील भारतीय दूतावासाने मृत भारतीयांचे पार्थिव शक्य तितक्या लवकर भारतात आणण्यासाठी प्रक्रिया सुरू केली असून जखमी भारतीय नागरिकांच्या उपचारांवरही लक्ष ठेवले जात आहे.
दूतावासाच्या माहितीनुसार, स्फोटात जखमी झालेले भारतीय नागरिक सध्या स्थिर स्थितीत आहेत आणि त्यांच्यावर स्थानिक रुग्णालयांमध्ये उपचार सुरू आहेत. तसेच त्यांच्या कुटुंबीयांशी सातत्याने संपर्क ठेवला जात आहे.
सरकारी मालकीच्या कतार एनर्जीने दिलेल्या माहितीनुसार, हा स्फोट बरझान गॅस प्रकल्पातील कामकाज पुन्हा सुरू करण्याच्या प्रक्रियेदरम्यान झाला. कंपनीने हा अपघात तांत्रिक कारणांमुळे झाल्याचे स्पष्ट केले असून कोणत्याही प्रकारच्या घातपाताचा किंवा हल्ल्याचा संबंध नसल्याचे सांगितले आहे.
हे ही वाचा:
अरूप रॉय तृणमूलच्या अध्यक्षपदी; बंडखोर गटाचा दावा
१५ जणांचा बळी घेणाऱ्या लखनौच्या इमारतीवर अनधिकृत बांधकामासंबंधी झाली होती कारवाई
‘बिनपाण्या’चा रोमांस वान्स-मुनीर यांचे पती, पत्नी और वो…
लखनऊमध्ये आग दुर्घटनेत कोचिंग सेंटरमधील १५ विद्यार्थ्यांचा मृत्यू
कतारचे ऊर्जा मंत्री साद शेरिदा अल-काबी यांनी सांगितले की, मृतांमध्ये भारतीय आणि पाकिस्तानी नागरिकांचा समावेश आहे, तर जखमींमध्ये कतार, बांगलादेश, नेपाळ, केनिया आणि घानाच्या नागरिकांचाही समावेश आहे.
दरम्यान, १२ भारतीय नागरिकांच्या मृत्यूमुळे देशभरातून शोक व्यक्त केला जात आहे. कतारमध्ये कामासाठी गेलेल्या भारतीय कामगारांच्या सुरक्षेचा मुद्दाही पुन्हा एकदा चर्चेत आला आहे. केंद्र सरकारने मृतांच्या कुटुंबीयांना सर्वतोपरी मदत करण्याचे आश्वासन दिले असून परराष्ट्र मंत्रालय परिस्थितीवर सतत नजर ठेवून आहे.
या दुर्घटनेमुळे अनेक भारतीय कुटुंबांवर दुःखाचा डोंगर कोसळला असून, मृतांचे पार्थिव मायदेशी आणण्यासाठी आणि प्रभावित कुटुंबांना मदत पोहोचवण्यासाठी भारत सरकार आणि भारतीय दूतावास युद्धपातळीवर प्रयत्न करत आहेत.
