केंद्रीय गृह मंत्रालयाने बौद्ध धर्मगुरू दलाई लामा यांना झेड श्रेणीची सुरक्षा दिली आहे. दलाई लामा यांच्या सुरक्षेबाबत गुप्तचर विभागाने गृह मंत्रालयाला अहवाल सादर केला होता, त्यानंतर हा निर्णय घेण्यात आला. याअंतर्गत, दलाई लामा यांना आता एकूण ३३ सुरक्षा कर्मचारी मिळणार आहेत. यामध्ये १२ कमांडो आणि ६ पीएसओ असतील, जे त्यांना २४ तास सुरक्षा प्रदान करतील. सुरक्षा कर्मचाऱ्यांमध्ये १० सशस्त्र स्थिर रक्षक असतील जे त्यांच्या निवासस्थानी उपस्थित राहतील.
दलाई लामा यांच्या सुरक्षेची खात्री करण्यासाठी प्रशिक्षित चालक आणि देखरेख कर्मचारी नेहमीच कर्तव्यावर असणार आहेत. गेल्या काही वर्षांपासून गुप्तचर अहवालांमध्ये चीन समर्थित घटकांसह विविध घटकांकडून दलाई लामा यांच्या जीवाला संभाव्य धोके असल्याचे संकेत मिळाले आहेत, त्यामुळे भारतीय अधिकाऱ्यांसाठी त्यांचे संरक्षण ही सर्वोच्च प्राथमिकता बनली आहे.
आतापर्यंत दलाई लामांच्या सुरक्षेची जबाबदारी हिमाचल प्रदेश पोलिसांच्या एका छोट्या तुकडीवर होती. जेव्हा ते दिल्ली किंवा इतर कोणत्याही ठिकाणी प्रवास करायचे तेव्हा त्यांना स्थानिक पोलिसांकडून सुरक्षा पुरवली जात होती. मात्र, आता तसे होणार नाही. केंद्रीय गुप्तचर संस्थांच्या आढाव्यानंतर केंद्र सरकारकडून त्यांना झेड श्रेणीची सुरक्षा प्रदान करण्यात आली आहे.
