भारतीय नौदलासाठी १३ नोव्हेंबर हा दिवस ऐतिहासिक ठरणार आहे. ओडिशातील आयएनएस चिल्का येथे नौदलाच्या अग्निवीरांची पासिंग आऊट परेड आयोजित करण्यात आली आहे. या सोहळ्यात ३३०० हून अधिक अग्निवीर आणि भारतीय तटरक्षक दलाचे नाविक आपले प्रारंभिक प्रशिक्षण पूर्ण करून सेवेत दाखल होण्याच्या दिशेने पुढचे पाऊल टाकणार आहेत. विशेष म्हणजे, आयएनएस चिल्का येथून एकाच वेळी प्रशिक्षण पूर्ण करून बाहेर पडणारी ही आतापर्यंतची सर्वात मोठी तुकडी ठरणार आहे. या ऐतिहासिक सोहळ्याला नौदलप्रमुख अॅडमिरल कृष्णा स्वामीनाथन प्रमुख पाहुणे आणि परेडचे निरीक्षण अधिकारी म्हणून उपस्थित राहणार आहेत.
या सर्व प्रशिक्षणार्थींनी १६ आठवड्यांचे कठोर प्रारंभिक प्रशिक्षण यशस्वीरीत्या पूर्ण केले आहे. या कालावधीत त्यांना शारीरिक तंदुरुस्ती, पोहणे, वर्गातील शैक्षणिक प्रशिक्षण, संचलन, मैदानी सराव आणि विविध लष्करी उपक्रमांचे प्रशिक्षण देण्यात आले. केवळ शारीरिकदृष्ट्या सक्षम जवान घडवणे एवढाच या प्रशिक्षणाचा उद्देश नसून, त्यांच्यामध्ये मानसिक कणखरता, शिस्त, नेतृत्वगुण आणि प्रतिकूल परिस्थितीत निर्णय घेण्याची क्षमता विकसित करण्यावरही भर देण्यात आला. नौदलाची कर्तव्य, सन्मान आणि साहस ही मूलभूत मूल्ये प्रशिक्षणार्थींच्या मनात रुजवण्याचा प्रयत्न करण्यात आला आहे.
हे ही वाचा:
प्रेयसीच्या पतीने जेन्सेनला हनीट्रॅप केले…
स्पेनमध्ये ४० लाख कामगारांचा देशव्यापी संप
सोलापूर विमानतळावर प्रशिक्षणादरम्यान विमानाचे हार्ड लँडिंग
संभलमध्ये मशिदीच्या अनधिकृत बांधकामावर बुलडोझर
या सोहळ्यानंतर आयोजित करण्यात येणाऱ्या समारोप कार्यक्रमाचे अध्यक्षस्थान दक्षिण नौदल कमांडचे फ्लॅग ऑफिसर कमांडिंग-इन-चीफ व्हाइस अॅडमिरल समीर सक्सेना भूषवणार आहेत. प्रशिक्षणादरम्यान उत्कृष्ट कामगिरी करणाऱ्या अग्निवीरांना, सर्वोत्कृष्ट विभागाला आणि उत्कृष्ट प्रशिक्षकाला पुरस्कार देऊन गौरवण्यात येणार आहे. याशिवाय प्रशिक्षणार्थींनी तयार केलेल्या ‘अंकुर’ या द्विभाषिक मासिकाचे प्रकाशनही यावेळी करण्यात येणार आहे. या सोहळ्याला अग्निवीरांचे कुटुंबीय, नौदलातील माजी अधिकारी आणि विविध क्षेत्रांतील मान्यवर उपस्थित राहणार आहेत.
विशेष म्हणजे, देशभरातील नागरिकांना या ऐतिहासिक क्षणाचे साक्षीदार होता यावे, यासाठी भारतीय नौदलाच्या अधिकृत सोशल मीडिया प्लॅटफॉर्मवर या पासिंग आऊट परेडचे थेट प्रक्षेपण करण्यात येणार आहे. १६ आठवड्यांच्या कठोर प्रशिक्षणानंतर ३३०० हून अधिक तरुण नौदल आणि तटरक्षक दलातील आपल्या नव्या जबाबदारीच्या दिशेने वाटचाल करणार आहेत. त्यामुळे हा सोहळा केवळ प्रशिक्षण पूर्ण झाल्याचा क्षण नसून, देशाच्या सागरी सुरक्षेसाठी सज्ज होणाऱ्या नव्या पिढीच्या जवानांचा महत्त्वपूर्ण टप्पा ठरणार आहे.
