उत्तर प्रदेशातील संभल जिल्ह्यातील कुतुबपूर सकता गावात मशिदीच्या अनधिकृत बांधकामावर प्रशासनाने गुरुवारी बुलडोझर कारवाई केली. सुमारे १३० चौरस मीटर क्षेत्रात करण्यात आलेले बांधकाम पाडण्याची प्रक्रिया सुरू करण्यात आली. या कारवाईदरम्यान कायदा आणि सुव्यवस्था राखण्यासाठी मोठा पोलीस बंदोबस्त तैनात करण्यात आला होता.
संभलच्या असमोली परिसरातील या गावात सार्वजनिक वापरासाठी असलेल्या जमिनीवर मशिदीचे बांधकाम सुरू असल्याची माहिती स्थानिक रहिवाशांनी प्रशासनाला दिली होती. त्यानंतर पोलीस आणि महसूल विभागाच्या संयुक्त पथकाने जागेची पाहणी केली. तपासादरम्यान बांधकामासाठी आवश्यक परवानगी नसल्याचे प्रशासनाचे म्हणणे आहे.
हे ही वाचा:
शत्रूला अनपेक्षित धक्का देण्यासाठी सज्ज राहा!
महापौर कार्यालयासह मुंबईतील सहा ठिकाणांना धमकी
यूपीमध्ये दलित-मुस्लिमांच्या मतासाठी ओवैसी-आझाद युती
मुंबईवर पाणीटंचाईचे सावट? आठ वर्षांतील नीचांकी साठा
या प्रकरणी मशिदीचे व्यवस्थापक मोहम्मद इरशाद यांना कागदपत्रे सादर करण्यासाठी नोटीस देण्यात आली होती. त्यांनी जमीन आणि वक्फ बोर्डातील नोंदणीशी संबंधित कागदपत्रे सादर केली; मात्र नव्या बांधकामासाठी उत्तर प्रदेश सुन्नी सेंट्रल वक्फ बोर्डाची परवानगी असल्याचा पुरावा सादर करू शकले नाहीत. त्यानंतर उपविभागीय दंडाधिकाऱ्यांनी बांधकाम अनधिकृत ठरवून ते हटवण्याचे आदेश दिले.
