श्रावण पौर्णिमेच्या शुभ मुहूर्तावर पंतप्रधान नरेंद्र मोदी यांनी ‘विश्व संस्कृत दिवस’ निमित्त देशवासियांना शुभेच्छा दिल्या. संस्कृत ही “ज्ञान आणि अभिव्यक्तीचा एक शाश्वत स्रोत” असल्याचे सांगत त्यांनी विविध क्षेत्रांतील तिचा कायमस्वरूपी प्रभाव अधोरेखित केला. जगभरात संस्कृत शिकणारे, शिकवणारे आणि लोकप्रिय करणारे विद्वान, विद्यार्थी व उत्साही यांचे त्यांनी कौतुक केले.
‘एक्स’ या सोशल मीडिया प्लॅटफॉर्मवर पंतप्रधान मोदी यांनी हिंदी, इंग्रजी आणि संस्कृत भाषेत तीन वेगवेगळे संदेश पोस्ट केले. त्यांनी लिहिले, “श्रावण पौर्णिमेच्या दिवशी आपण विश्व संस्कृत दिवस साजरा करतो आहोत. संस्कृत ज्ञान व अभिव्यक्तीचा शाश्वत स्रोत आहे, तिचा प्रभाव सर्व क्षेत्रांत दिसून येतो. हा दिवस जगभरातील संस्कृत प्रेमींच्या प्रयत्नांचा गौरव करण्याची संधी आहे.”
मोदी यांनी पुढे सांगितले की, मागील दशकभरात सरकारने संस्कृतला लोकप्रिय करण्यासाठी अनेक महत्त्वाची पावले उचलली आहेत. यात केंद्रीय संस्कृत विद्यापीठ, संस्कृत शिक्षण केंद्रांची स्थापना, संस्कृत विद्वानांना अनुदान, तसेच पांडुलिपींच्या डिजिटायझेशनसाठी ‘ज्ञान भारतम्’ मिशनचा समावेश आहे.
केंद्रीय शिक्षण मंत्री धर्मेंद्र प्रधान यांनीही शुभेच्छा देत लिहिले, “संस्कृत ही आपल्या संस्कृती, सभ्यता आणि संस्कारांची मूळ आधारशिला आहे. तिच्या संवर्धनासाठी आपण सर्वांनी कटिबद्ध राहिले पाहिजे.”
उत्तर प्रदेशचे मुख्यमंत्री योगी आदित्यनाथ यांनी संदेशात लिहिले, “देववाणी संस्कृत ही भारताच्या आत्म्याची अभिव्यक्ती, ऋषिवाणीचे स्पंदन आणि सनातन ज्ञानाचा अनंत स्रोत आहे. तिच्या संरक्षण व प्रसारासाठी आपण संकल्प करूया.”
दिल्लीच्या मुख्यमंत्री रेखा गुप्ता यांनी म्हटले, “संस्कृतने केवळ भारतीय संस्कृतीला आकार दिला नाही, तर जगभरातील ज्ञानाच्या विविध क्षेत्रांत मोलाचे योगदान दिले आहे. आपल्या प्राचीन ग्रंथांची आणि विज्ञानाची गूढ परंपरा समजण्यासाठी संस्कृतचे ज्ञान आवश्यक आहे.”
