ज्येष्ठ तेलुगू चित्रपट अभिनेते कोटा श्रीनिवास राव यांचे हैदराबाद येथे निधन

दक्षिण भारतीय चित्रपटसृष्टीचा चेहरा असलेले कोटा श्रीनिवास राव यांचे रविवारी पहाटे ४ वाजता हैदराबाद येथील त्यांच्या निवासस्थानी निधन झाले. ८३ वर्षीय कोटा श्रीनिवास राव यांनी ७०० हून अधिक चित्रपटांमध्ये काम केले. त्यांच्या निधनाने तेलुगू चित्रपटसृष्टीसह भारतीय चित्रपटसृष्टीला धक्का बसला आहे.

श्रीनिवास राव यांच्या निधनाबद्दल शोक व्यक्त करताना राज्याचे मुख्यमंत्री चंद्राबाबू नायडू यांनी सोशल मीडिया प्लॅटफॉर्म X वर लिहिले – ‘आपल्या बहुमुखी भूमिकांनी चित्रपट प्रेक्षकांची मने जिंकणारे प्रसिद्ध अभिनेते कोटा श्रीनिवास राव यांचे निधन अत्यंत दुःखद आहे. त्यांचे कलात्मक योगदान आणि जवळजवळ चार दशकांपासून चित्रपट आणि नाट्य क्षेत्रात त्यांनी साकारलेल्या भूमिका अविस्मरणीय राहतील.

खलनायक आणि पात्र कलाकार म्हणून त्यांनी साकारलेल्या असंख्य संस्मरणीय भूमिका तेलुगू प्रेक्षकांच्या हृदयात कायमच्या कोरल्या जातील. त्यांचे निधन तेलुगू चित्रपटसृष्टीचे अपूरणीय नुकसान आहे. १९९९ मध्ये, त्यांनी विजयवाडा येथून आमदार म्हणून विजय मिळवला आणि जनतेची सेवा केली. मी त्यांच्या कुटुंबियांना माझ्या मनापासून संवेदना व्यक्त करतो.’

१० जुलै १९४२ रोजी आंध्र प्रदेशातील कांकीपाडू येथे जन्मलेले कोटा श्रीनिवास राव हे महाविद्यालयीन काळापासूनच रंगभूमीवर रुजू झाले. त्यांनी ७०० हून अधिक चित्रपटांमध्ये काम केले. त्यांनी राजकारणातही नशीब आजमावले. १९९९ मध्ये ते भाजपच्या तिकिटावर विजयवाडा पूर्व येथून आंध्र प्रदेश विधानसभेवर निवडून आले.